கரிசல் மண்ணின் காற்றை பருகியவன்.......

ஒரு பயணத்தின் கதை...

2011-11-24T05:47:00.000-08:00

அவசர பயண முடிவுகளில்
பெரும்பாலும்
இரயில் பயணம் சாத்தியமில்லை...

உடல் கிழிக்கா இருக்கை வேண்டும்
உடனே திறக்கும் கண்ணாடியோடு
உலுக்கி எடுகாத பேருந்து‌‌ வேண்டும்...

உணவு தண்ணீர் எடுத்து
உணர்வோடு வைக்க வேண்டும்
இல்லையெனில்
உணவகங்களுக்கு ஒரு நூறு
அழுதாக வேண்டும்...

சிரித்த முகத்துடனே நடத்துனர்
சில்லரை தரவேண்டும்
சேரும் நேரம் கேட்டால்
சீராத ஓட்டுனர் வேண்டும்

ஏழையாய் இருந்தாலும்
இவையோடு சேர்ந்து இப்பொழுது
இருமடங்கு கட்டணமும் வேண்டும்...

அத்தனை இடர்படுகளும்
அர்த்தமற்றதாகி போகின்றன‌
அன்பு நிறைந்த
உறவுகளை பார்க்கும்போது...

மீண்டும் அதே பயணம்
மாறாத அதே அழுத்தங்கள்
இருந்தும் தயாரகிறோம்
அடுத்த பயணத்தை நோக்கி
சொந்த ஊரின் சுகத்தை அனுபவிக்க....!

மக்கள் போ(தூ)ற்றும் அரசு....!

2011-11-18T04:41:00.000-08:00

மக்கள் அரசு என்பது மக்களை அரவணைப்பதாகவும் , அவர்களுக்கு வழிகாட்டுதலாகவும் மற்றும் முன்னோடியாக போற்றுதலுக்கு உரியதாகவும் இருக்க வேண்டும்.

"நல்லதோர் வீணைசெய்தே-அதை
நலங்கெடப் புழுதியில் எறிவதுண்டோ?
சொல்லடி,சிவசக்தி!-என்னை
சுடர்மிகும் அறிவுடன் படைத்துவிட்டாய்,
வல்லமை தாராயோ,இந்த
மாநிலம் பயனுற வாழ்வதற்கே? "
-- பாரதியார்

நல்ல ஒரு காரியம் செய்து அதை குப்பையில் போடுவதற்காகவா மனிதனை அறிவுடன் படைக்கப்பட்டான். நல்ல காரியம் செய்யாவிட்டாலும் பரவயில்லை பிறர் செய்த நல்ல காரியங்களை குப்பையில் போடுவது என்பது மிகபெரிய மனித துரோகம். முற்காலத்தில் போரிட்டு நாடுகளை கைப்பற்றும் போது கூட அந்தந்த நாடுகளில் உள்ள அறிவு சார்ந்த விசயங்களை ஒரு பொழுதும் அழிக்க முற்பட்டதில்லை ஆனால் தற்பொழுது நடக்கும் நிகழ்ச்சிகளை பொறுத்தி பார்க்கும் போது நாம் பெற்ற வளர்ச்சியெல்லாம் ஒன்றுக்கும் உதவ போவதில்லை என்பது மட்டும் திண்ணமாகின்றது.

அண்ணா நூற்றாண்டு நூலகம் மாற்றம் என்ற அறிவிப்பு வாசிக்கும் பழக்கமுடைய அனைவருக்கும் பெருத்த அதிர்ச்சி. ஒரு நூலகத்திற்கென்றே வடிவமைப்புகளுடன் கட்டபட்ட கட்டிடத்தை மருத்துவமனையாக்குவது என்பதும் வீண்செலவான விசயம்.அப்படி மாற்றும் செலவினங்களோடு கூடுதலாக நிதி சேர்த்து புதியதாக ஒரு மருத்துவமனையையே கட்டிவிடலாம் அப்படி இருக்க நூலகத்தை இடமாற்றம் செய்வது என்பது ஏன் என்பதுதான் புரியவில்லை. நூலகங்களின் எண்ணிக்கை உயர்வது நிச்சயம் நல்ல விசயம்தான், ஆட்சியாளர்கள் அதனை வேறொரு இடத்திற்கு மாற்றம் செய்யவேண்டும் என நினைப்பவர்கள் ஏன் ஒரு புதிய நூலகத்தை கட்டகூடாது?. சென்னை இல்லாது மதுரை,திருச்சி மற்றும் கோவை போன்ற நகரங்களில் நூலகத்தை கட்டுங்கள் யார் உங்களை வரவேற்காமல் இருக்க போகிறார்கள்.அதை விடுத்து காழ்ப்புணர்ச்சியில் செய்யும் செயல்கள் நிச்சயம் ஓட்டு போட்ட மக்களுக்கு செய்யும் ந‌ம்பிக்கை தர்மம் கிடையாது மாறான துரோகம்.

கட்டண‌ உயர்வுகள் :

எந்த ஒரு சாமனிய மனிதனும் ஏற்றுகொள்ள முடியாத அளவு விலை ஏற்றங்கள் நடந்துள்ளது.நாம் அறிந்த வரையில் பெரும்பாண்மையான மக்களை முகம் சுழிக்க வைக்கும் ஒரு காரியம் இது.ஏற்கனவே விலை உயர்வுகளை சந்திக்க முடியாமல் துண்பங்களில் ஆழ்ந்து கிடக்கும் மக்களுக்கு இது மேலும் பலத்த அடி.பால் விலை உயர்வு 6 ரூபாய்,பேருந்து கட்டணம் 40 ல் இருந்து 60 சதவிகிதம் உயர்வு எண்பது சதாரண மக்களை நேரடியாக பாதிக்க கூடிய விசயங்கள்.இந்த விலை உயர்வுக்கு எடுத்து சொல்லும் காரணங்களும் ஏற்றுக் கொள்ளவே முடியாத ஒன்று.

1.மத்திய அரசின் நிதி வரவில்லை: இது எப்படி நம்ப தகுந்ததாக இருக்க முடியும்.எல்லா மாநிலங்களுக்கும் குறிப்பிட்ட நிதி ஒதுக்கப்பட்டு கொடுக்கதானே மத்திய அரசு இருக்கிறது,மற்ற மாநிலங்கள் இதைபற்றி ஒரு குறையும் சொல்லவே இல்லையே.நீங்கள் உங்களது சுய விளம்பரத்திற்காக கொடுக்கும் இலவசங்களுக்கு நிதிஉதவி கேட்டால் எப்படி மத்திய அரசு கொடுக்கும்,இதை நீங்கள் இலவசங்களை அறிவிப்பதற்க்கு முன்னால் அல்லவா யோசித்திருக்க வேண்டும்.அப்ப‌டியே மத்திய அரசு நிதி வழங்காவிட்டாலும் அதை வாங்கும் முயற்ச்சி செய்யாமல் மக்களின் தலைமேல் சுமத்துவது எந்த விதத்தில் நியாயம்.

2.ஆவின் மற்றும் போக்குவரத்து கழகங்கள் இழப்பில் இயங்குகிறது: இந்த கழகங்கள் இழப்பில் இயங்குவதற்கு யார் காரணம்? அவை வெற்றிகரமாக இயங்குவதற்கு என்ன முயற்ச்சிகள் எடுத்தீர்கள்?. காரணத்தை அறியாமல் அந்த சுமையை மக்கள் மேல் ஏன் சுமத்துகிறீர்கள்.இந்த விலை உயர்வினால் அந்த நிறுவனங்கள் நல்ல நிலை அடையுமா? பக்கத்தில் உள்ள கர்னாடகத்தில் நீங்கள் தற்போது உயர்த்திய விலையை விட 30 சதவிகிதம் குறைவு ஆனால் அவர்களின் பராமரிப்பிலும் சேவைசெய்யும் விதத்திலும் மிகவும் தரமானவர்களாக இருக்கிறார்கள் அப்படி இருக்கும் போது மற்ற மாநிலங்களை கட்டண‌ விசயத்தில் மட்டும் நீங்கள் ஒப்பிடுவது எந்த விதத்தில் நியாயம்.கட்டணங்களை உயர்த்திய நீங்கள் வசதிகளை பெருக்குவதற்கும் ஒழுங்காக சேவை செய்வதற்கும் என்ன உத்திரவாதம் தந்திருக்கிறீர்கள்.

இழப்பில் இயங்குகிறது என்பதற்காக இரண்டு நிறுவனத்தையும், அலுவலர்களையும் காப்பாற்ற வேண்டும் என்று கதை சொல்லும் நீங்கள் 15,000 கோடி வருமானம் வரும் மதுபான நிறுவனத்தில் வேலை பார்ப்பவர்களை ஏன் நிரந்தர பணியாளர்களாக மாற்ற மறுக்கிறீர்கள் ,அவர்களின் நியாயமான கோரிக்கைகளை மறுப்பது ஏன்? 13,000 மக்கள் நல பணியாளர்களை எந்த அடிப்படையில் வெளியேற்றினீர்கள்.இழப்பில் இயங்கும் நிறுவனத்திற்க்காக விலையை உயர்த்தும் நீங்கள்,லாபத்துடன் இயங்கும் நிறுவன ஊழியர்களுக்கு சரியான சம்பளம் கொடுக்காமல் கூட வதைப்பது எப்படி சரியானதாகும்.ஏன் இந்த பாகுபாடு செய்கிறீர்கள்,எல்லோரையும் ஒரே மாதிரியாகத்தானே பார்த்திருக்க வேண்டும்.பால் கொள்முதல் விலை 2 ரூபாய் அதிகரிப்பு ஆனால் விற்பனை 6 ரூபாய் அதிகரிப்பு.பால் உற்பத்தி செய்யும் மக்களுக்கு எந்த லாபமும் கூடாதாம் ஆனால் மக்கள் மேல் சுமையை ஏற்றி லாபத்தை சம்பாதிக்கலாமாம் இது எந்த வகையில் மக்கள் நலனை சார்ந்ததாக இருக்க முடியும்? .
சாதாரண , நடுத்தர மக்கள் ஏற்கனவே பல்வேறு வரிச்சுமைகளிலும் நடுங்கி வாழ்ந்து கொண்டிருக்கையில் மீண்டுமொரு பெரியொதொரு விலையேற்றம் என்பது ஏற்றுகொள்ளவே முடியாது.இனிமேல் தேனீர்,காப்பி என்பதெல்லாம் திருநாளுக்கு செய்யும் பதார்த்தம் போல் ஆனாலும் ஆச்சர்ய படுவதற்க்கு ஒன்றுமில்லை.இரயில் பயணங்களுக்கு கூட்டம் அதிகபடியாக அலைமோதும் என்பதிலும் மாற்று கருத்து இல்லை. இந்த விலை உயர்வை முன்வைத்து தனியார் பால் நிறுவனங்கள் மற்றும் பேருந்து நிறுவனங்கள் தங்கள் விலையை உயர்த்திக்கொள்வது நிச்சயம்,ஆக யோசித்து பார்த்தால் தனியார் நிறுவனக்களின் சதி இங்கு இருக்க கூடும் என்பது பாமரனுக்கும் புரிந்து போய் விடுகின்றது.இதற்கு மேலும் மக்கள் போற்றும் அரசா இல்லையா என்பதை மக்கள்தான் முடிவெடுப்பர்.எது எப்படியோ ஓட்டு போட்ட மக்கள் ஏதோ முனுமுனுப்பது தெரிகிறது.ஆனால் என்ன செய்வது இன்னும் 4 ஆண்டு காலம் தலை எழுத்தை மாற்ற முடியாது என்பது மட்டும் நிச்சயம்.

மழை நாளின் மிச்சம்...!

2011-09-06T06:33:00.000-07:00

கை வலிக்குமென்றென்னி
காதலோடு குடையை நான் கேட்க‌
வேண்டாமென முறைத்தாய்
வேண்டும் என்றே என்னை
வெட்க மழையில் நனைத்தாய்....

அவயங்கள் பட்டுவிடுமோ என‌
அதீத‌ எச்ச‌ரிக்கையில்
அச்ச‌த்தோடு நான் ந‌ட‌க்க‌...
நீ
நெருங்கி ந‌ட‌ந்து வ‌ந்து
நெருப்பு சுவாச‌த்தால்
நெஞ்ச‌த்தை குலைத்தாய்....

ம‌ழையின் குளிர்
ம‌ன‌திற்க்குள் இருக்க‌
உடலின் குளிரையெல்லாம்
ஓரக்கண்ணால் விரட்டி அடித்தாய்...

மழைநீரை கையில் ஏந்தி
மாறி மாறி என்மேல் எரிந்து
தண்ணீரை கூட கை வைத்து
பண்ணீராக்கி தந்தாய்....

ச‌ல‌ ச‌ல‌த்த‌ கொலுசு ச‌த்த‌ம்
ச‌ட‌ ச‌ட‌வென்ற‌ ம‌ழை நீரில்
ச‌த்த‌ம் ஓய்ந்த‌துபோல்
ப‌ட‌ ப‌ட‌த்த‌ என் ம‌ன‌தினை
ப‌தை ப‌தைத்த‌ உன் விர‌ல் தொட்டு
யுத்த‌ம் நிறுத்தி கடந்தாய்.....

சத்தமில்லாமல் என்மனதில்
சாகசங்கள் பல‌ புரிந்தாய் - ஓர்நாள்
சந்தியில்நின்று ஏதுமில்லை எனசொல்லி
சாதுர்யமாய் எனை பிரிந்தாய்...

ஆனால் நான்
கொஞ்சம் நேற்று பொழிந்த‌
கோடை சிறு மழைக்கே
கலையாத‌ உன்நினைவுகளில்
களிப்போடு நனைந்து வந்தேன் - இப்படி
மொத்தமாய் கொட்டிதீர்த்த‌ மழைகளில்
மிச்சமாய் நின்றது எனது காதலும்..
உனைப்பற்றிய எனது கவிதைகளும்தான்...!

வெளிவந்த படைப்பு நன்றி :தமிழ்ஆதர்ஸ்.கொம்

கலங்கி போன சாமி...

2011-09-04T19:09:00.000-07:00

அதிகாலை நான்கு மனிக்கு
அக்னி வளர்த்து யாகம்
காலையில் களைகட்டும்
பொங்கல் விழா
மதியம் கருவாட்டு குழம்பு கூழ் ஊற்றி
மகிழ்ச்சி கொண்டாட்டம்
மாலையில் கரகாட்டம் அதில்
மதி மயங்கும் குத்தாட்டம்
இரவில் தேர்ப்பயண வீதிஉலா என‌
இனிமையாக இருந்தது திருவிழா...

நள்ளிரவு ஆடல் பாடலில்
தலைவன் பாடல் போடவில்லை என்ற‌
தடியடி கலவரத்தில்
தப்பித்து ஓடிய கூட்டத்தைப் போலவே
கருவறைக்குள் நடுங்கியபடி
கலங்கிக் கொண்டிருந்தது
எல்லோரையும் காக்கும் சாமி...!

நன்றி : கீற்று

நேற்று முளைத்த காளானும்... பழைய பூதங்களும் ...

2011-08-25T22:01:00.000-07:00

அன்னா ஹாசரே மெற்கொள்ளும் ஊழல் எதிர்ப்பு போராட்டத்திற்க்கு இவ்வளவு ஆதரவை கண்டு உண்மையில் இது இந்தியாதானா எனும் அளவுக்கு ஆச்சர்யம் எழுகின்றது , நாம் சாரசரி வாழ்க்கையில் ஊழல் இல்லாத இடமே இல்லை... பழகிப்போன, கறைபடிந்த, அர்த்தமில்லாத,தேசத்தின் துரோகமான‌ ஊழலை எதிர்ப்பது என்பது சாதாரன விசயமில்லை,அதற்கு பெருகி வரும் ஆதரவுகள் நிச்சயம் பாராட்டக்கூடிய விசயம்தாம்.

எல்லாம் சரிதான் இவ்வளவு நாளாய் எங்கே போனாய் என் தேசமே? வேறு எவறுமே போராடவில்லையா? இல்லை போராடியவர்கள் உங்கள் கண்ணுக்கு தெரியவில்லையா ? போராடியவர்களை இந்த ஊடகம் சரியாக உங்களுக்கு அடையாளபடுத்த வில்லையா? இல்லை எல்லோரும் ஆதரவு தருகிறார்கள் நாமும் கலந்து கொள்வோம் என்று சொல்கிறீர்களா? இல்லை மட்டைபந்தில் சொதப்பிய இந்திய அணியை பார்த்த வெறுப்பில் வந்த கூட்டமா, நாளைக்கே இந்தியாவை கடனாளியாக்கி விட்டு இரண்டொரு வெற்றிகளை குவித்து விட்டால் தொலைக்காட்சி முன் அமர்ந்து தவமிருக்க‌ போய்விடுவீர்களா?.

தனியார் முதலாளிகளின் ஊழலுக்கும்,அரசு ஊழியர்களின் ஊழலுக்கும் எதிராய் கிளர்தெழுந்தவர்களை நக்சல்கள் என்று கூறி அடக்குகிறோம்.அவர்களின் போராட்ட பாதை தவறு என ஏற்றுக்கொள்ளும் அதே தருணத்தில், அவர்களின் போராட்ட காரணத்திற்கு என்ன பதில் சொன்னோம். இயற்கை வளங்களை அபகரிக்கும் தனியார் முதலாளிகளை ஆதரிக்கிறோம் என்ற பெயரில் ஊழலுக்கு ஆதரவு தரும் அரசையும் நம்மையும் என்னவென்று சொல்வது(இதைதானே அருந்ததி ராயும் வழியுறுத்தி சொல்கிறார்).இதைப்போன்ற பழைய பூதங்களை நம் கண் முன் மறைக்கப்பட்டது ஏன்?.அவற்றை பற்றி அறிந்து கொள்ள கூட முற்படாத‌ நாம் நேற்று கிளம்பிய ஊழல் போராட்டதிற்கு ஆதரவு தருகிறேன் என்று கிளம்புவதும், இதை வைத்து ஆதாயம் தேட விளையும் புல்லுருவிகளை பாராட்டுவதையும் நினைத்தால் நகைச்சுவைதான் வருகின்றது.

இவ்வளவு ஏன்? அன்னா ஹசாரே போராட்டம் நடத்தும் இதே நேரத்தில் இன்னொரு முக்கிய போராட்டமும் நடைபெறுகின்றது அதுவும் பாராளுமன்ற வாசலிலேயே நடக்கிறது, அதுவும் நம் வாழ்க்கை சம்பந்தபட்ட ஒன்றுதான் எத்தனை பேருக்கு அந்த போராட்டம் தெரியும்? எத்தனை பேர் அதற்கு ஆதரவு கொடுத்து கொண்டிருக்கிறார்கள்? அதுவும் இன்றியமையாத உணவு பொருள் மரபனு கலப்பினத்திற்கு எதிராக‌ பசுமைபுரட்சி(கிரீன்பீஸ்) அமைப்பினர் செய்யும் ஆர்பாட்டம். இந்த "இந்திய உயிரி‍தொழில்நுட்ப ஒழுங்காற்று ஆணையம்" மசோதாவும் பாராளுமன்றத்தில் தாக்கல் செய்யப்பட்டுள்ளது அதை அனுமதித்தால், வளரும் சந்ததிக்கு நம் கையினாலேயெ பூச்சிக்கொள்ளியை உணவு என்னும் பெயரில் கொடுக்க நேரிடலாம், மேலும் மரபனு பற்றி தவறாக மக்களிடத்தில் சொன்னாலே சிறை தண்டனையாம். என்ன ஒரு கொடுமை , தனியார் மயவாதிகளும் ,அரசியல் வாதிகளும் இணைந்து செயல்படுத்த போகும் இப்படி பட்ட‌ ஒரு மசோதாவும்தான் இருக்கிறது.இதை பற்றி என்ன சொல்ல போகிறோம்? இதற்கு ஏன் மக்கள் யாரும் திரளவில்லை?

ஊழல் எதிர்ப்பு முறையாக அமல்படுத்தப்பட்டு நல்ல காரியங்கள் நடக்கும் என்றால் அது நல்லது.இந்த போராட்டம் "லொக்பால்" வரம்புக்குள் பிரதமரும் வரவேண்டும் என்றும் உடனே அமல்படுத்த வேண்டும் என்று தொடர்கிறது.அப்படி நடைமுறைபடுத்திய பின் எல்லாம் சரியாக நடக்குமா? அதற்கு என்ன உத்திரவாதம் தரமுடியும்.இதை ஆதரிக்கும் எதிர்கட்சிகளும் நாளை ஆட்சிக்கு வந்தால் மாறக்கூடும்,இன்னும் சொல்லப் போனால் எதிர்கட்சிகளின் அரசியலுக்கு அன்னா பலியகிறாரோ என்ற எண்ணம் கூட வருகின்றது.இன்று ஊழலுக்கு எதிராக கொடி பிடிக்கும் நாம் சாதீயம் குறித்தோ, ஏழ்மை நிலைக்கு எதிராகவோ போராடும் போது அவரவர் வேலை பார்த்து கொண்டுதானே செல்கிறோம்.சுதந்திரம் வாங்கியதில் இருந்து துயரப்படும் அடித்தட்டு மக்களுக்கு எவரும் போராட முன் வருவதில்லையே அல்லது அப்படி வருவோரை மட்டம் தட்டுவதிலேதானே நாம் காலத்தை கழித்திருக்கிறோம். இது குறித்து எப்போதாவது நாம் சிந்தித்திருக்கிறோமா? இல்லை சிலர் போல் "அதற்கெல்லாம் போராட ஆள் இருக்கிறார்கள்" என்று சொல்ல வருகிறோமா? இல்லை "நான் செய்யலாம் என்று இருந்தேன் அவர்கள் செய்கிறார்கள்,நான் எப்படி அவர்களுக்கு ஆதரவு தரமுடியும்" என்று சொல்ல வருகிறோமா? (இப்படி சொன்னவர்கள் எல்லாம் இன்று ஊழல் எதிப்பு போருக்கு ஆதரவு தருகிறார்களாம்!?). இவையெல்லாம் மாறி என்று நாம் ஒரே சிந்தனையில் உருப்பெற போகிறோம்? தமிழர்கள் நாம் ஒன்றினைந்து நினைத்திருந்தால் ஒட்டுமொத்த இந்தியாவையும் ஏன் உலகையும் கூட இலங்கை விசயத்தை புரிதல் செய்திருக்க முடியும் ஆனால் நம் போராட்ட களங்களை தனியாக பிரித்து, நமக்குள் தனிதனியாய் பிரிந்து நம் சொந்தங்களை இழந்து பழி சொல்லுக்கு இன்று ஆளாகி இருக்கிறோம். இவையெல்லாம் நம் கண்ணில் தெரியாமல் மறைத்த‌ புண்ணியத்தை யார் செய்தது? அப்போதெல்லாம் எங்கே போயிருந்தது இத்தனை பெரும் இந்தியா?

                                           ஊழல் விசயத்தில் நான் கொடுக்கமாட்டேன், வாங்கமாட்டேன் என்ற இரண்டு விதிகள்தான் ஆனால் சராசரி பதில் என்ன வரும்?, "நடைமுறை வாழ்க்கையில் இதெல்லாம் சாத்தியம் ஆகாது".இந்த பதில் எல்லாம் அர்த்தமில்லாத ஒன்று,சாத்தியம் என்று வருகிறதோ அன்று சிறிய அளவிலும் சரி,பெரிய அளவிலும் சரி ஊழல் இருக்காது.இதே அரசு "லோக்பால்" மசோதா நிறைவேற்றினாலும் ஊழலை மறைக்க முடியாது காரணம் மனிதர்களிடம் பணம் சேர்க்கும் ஆசையும்,வெறியும் புரையோடிபோய் கிடக்கின்றது.நேர்வழியில் சம்பாதிக்க எவரும் விரும்பாத நிலை நிகழ்ந்துகொண்டிருக்கிறது.நாம் அரசியல்வாதிகளையும்,அரசு அலுவலர்களையும்,தனியார் முதலாளிகளையும் குறைசொல்லி ஒன்றும் பயனில்லை, நாமும் மாறவேண்டும் அதுதான் ஊழலை ஒழிக்க நிரந்தர வழி.ஒவ்வொரு மனிதனும் மனிதனாய்,இந்தியனாய் நினைத்தால் அது முடியும். போராட்டம் என்பது மனித‌ சக்தியை திரட்டும் பெரும் யுக்தி, யாரோ சொல்கிறார்கள் என்பதற்காக உங்களை இணைத்துக் கொள்ளாமல் சுயமாக சிந்தனை செய்து போராடுங்கள்.நேர்மையான நல்ல காரியங்கள் நடக்கவேண்டும் என்பதற்காய் போராடுங்கள். மனிதன் மனிதனாய் வாழ்வதற்கு போராடுங்கள்.

        இந்தியா நிறைய இடங்களில் முன்னேற வேண்டியதிருக்கிறது சாதீயம்,மதம்,ஏழ்மை,தீவிரவாதம்,ஊழல் மற்றும் இன்னும் பற்பல.இவை எல்லாம் முற்றிலும் மாற வேண்டுமானால் மனிதர்கள் நாம் மாறவேண்டும் அதுதான் இந்தியா ஒளிர்வதற்க்கு விளக்காகுமே தவிற இது போன்று ஒருவர் பின்னே ஓடிவரும் செம்மறி ஆடுகளாய் இருப்பது நமக்கு அவசியமே இல்லாத ஒன்று.எதற்காக போராடுகிறோம் என்று அறிந்து பின்தொடர்வோம், போராடுவோம். ஒவ்வொரு இந்தியனும் நினைத்தால் சாதீயம், மதம்,ஏழ்மை, தீவிரவாதம், ஊழல் எதுவுமே இல்லாத இந்தியாவை உருவாக்க முடியும்.ஆம் நாம் நினைத்தால்தான் அது முடியும்.

காதல் பக்கம் ‍ - 1

2011-08-08T05:22:00.000-07:00

காத்திருக்கும் தீர்ப்பு....!

2011-07-27T06:48:00.000-07:00

காத்திருக்கும் தீர்ப்பு...

தமிழகத்தின் ஒவ்வொரு தமிழனும் வாதிடும் சூடான சமாச்சாரம் சமச்சீர் கல்வி. சமச்சீர் கல்வியைப் பற்றி பல்வேறு தரப்பினர் சார்பாகவும்,எதிராகவும் அலசி ஆராய்ந்த பிறகு அதனை பற்றி எழுதி கட்டுரையின் பாதையை மாற்ற விரும்பவில்லை, ஆனால் தமிழகத்தில் இன்றைய நிலையில் பாதிக்கப்படும் பல்வேறு பிரச்சனைகள் உள்ளன அவற்றை பற்றி விளக்குவதே கட்டுரையின் நோக்கம்.

1. சமச்சீர் கல்வி:

இன்றைய சமச்சீர் கல்வி விசாரணையில் உச்சநீதி மன்ற நீதிபதி கேட்ட கேள்வி:

"எப்போது சமச்சீர் கல்வி அமல்படுத்தப்படும்? காலக்கெடு ஏதாவது உள்ளதா? "

தமிழக அரசு நீதிபதியின் பதில்:

"2012-ம் கல்வி ஆண்டில் சமச்சீர் கல்வியை அமல்படுத்த முயற்சி செய்யப்படும்"

ஆக 2012 லும் முயற்ச்சி செய்யப்படும் உறுதி கிடையாது. இவ்வளவு முட்டுக்கட்டை சமச்சீர் கல்விக்கு ஏன்? ஏன் இவ்வளவு பிடிவாதம் பிடிக்கிறீர்கள் இந்த விசயத்தில்.

எங்களுக்கு சில கேள்விகள் மனதில் எழுகின்றன.

* நீதிமன்றங்கள் சமச்சீர் கல்வியை அமல்படுத்த ஆணையிடுகின்றனவே அவை எதையும் ஆராயாமலா சொல்கிறார்கள்?. நீதிமன்றம் மாறுதல் செய்து கொள்ளலாம் என்று சொன்ன பிறகும் சரியில்லை... சரியில்லை... என்று பிடிவாதம் பிடிக்கும் நோக்கம் என்ன?

* இத்தனை பேர் சேர்ந்து(இந்திய தொழில் நுட்ப கழக பேராசிரியர்கள் உட்பட) உருவாக்கிய பாட திட்டம் தவறு என்றால் நீங்கள் உருவாக்கும் குழு மட்டும் எப்படி அறிவாளிகளாக இருந்து விட முடியும்?

* ஒரு புத்தகம் முழுக்க ஒரு சார்பாக இருக்க முடியாது , சார்பான பக்கங்களை ம‌ட்டும் வெட்டி எடுத்து விடுவதில் என்ன சிரமம் இருக்க போகிறது?

* நீங்கள் உருவாக்கும் குழு உங்கள் துதி பாடி சமச்சீர் புத்தகத்தை மாற்றவேண்டும் என்று எண்ணுகிறீர்களா ? இல்லை தனியார் பள்ளிகளை திருப்தி படுத்த வேண்டும் என்று நினைக்கிறீர்களா?(நீங்கள் உருவாகிய சமச்சீர் கல்வி ஆய்வு குழுவை ஆராயும் போது மேற்குறிப்பிட்ட இரண்டும் உண்மை போல்தான் தோன்றும்)

* இன்றைய நிலையில் மாணவர்களை இப்படி வதைப்பது தகுமா? இவர்கள்தான் அடுத்த தேர்தலில் ஓட்டு போடும் நிலைக்கு வருபவர்கள் அன்று இவற்றை நினைத்து பார்க்க மாட்டார்களா?.

* கடைசியாக எப்பொழுதுதான் சமச்சீர் கல்வியை அமுல்படுத்துவீர்கள்? . சமச்சீர் கல்வி வருமா? வராதா?

2. விலைவாசி உயர்வு:

கடந்த ஆட்சியில் விலைவாசி உயர்வு தலை விரித்தாடியது என்றுதான் ஆட்சி மாற்றம் விரும்பினோம்.அதன் படியே ஆட்சி மாறியது விலைவாசி குறைந்ததா? இல்லையே...

மத்திய அரசு வாகன எரி பொருட்களுக்கு விலை உயர்த்தியபோது தமிழக அரசு வரியை குறைத்து மக்கள் மனதில் கொஞ்சம் சந்தோசத்தை தந்தீர்கள்,ஆனால் அடுத்த இரண்டு வாரங்களிலேயே அனைத்திலும் வரியை உயர்த்தி சாபத்தை வாங்கி கொண்டீர்களே இது என்ன சாமர்த்தியம்?

மத்திய அரசு விலை உயர்த்திய போது கூப்பாடு போடும் நீங்கள், இங்கு வரிகளை உயர்த்தி கொள்வது எந்த விதத்தில் நியாயம் ? இதற்க்கு மட்டும் எப்படி மற்ற மாநிலங்களை காரணம் சொல்கிறீர்கள்.அடித்தட்டு மக்கள் அன்றாடம் படும் அவலம் உங்களுக்கு தெரிய வில்லையா?விலை ஏற்றுவதற்க்குத்தான் உங்களை ஆட்சியில் அமர்த்தினோமா?.கடந்த ஆட்சியில் 1 ரூபாய்க்கு அரிசி தந்து மற்றவை விலை அதிகமாயிருந்தது , இப்பொழுது இலவசமாக அரிசி தந்திருக்கிறீர்கள் மற்றவை அப்படியேதான் இருக்கிறது அல்லது அதிகரித்திருக்கிறது அவ்வளவுதான் வித்தியாசம்.என்ன மாற்றம் கொண்டு வந்திருக்கிறீர்கள்,3 மாதத்திற்குள் எப்படி முடியும் என்று கேட்பவர்களுக்கு... 3 மாதத்திற்க்குள் பழைய அரசின் திட்டங்களை இவ்வளவு எதிர்க்க முனைந்த நேரங்களை இதில் கொஞ்சம் செலவிட்டிருக்கலாமே...

3. மின்சார பிரச்சனை:

சமீபத்தில் என் அலைபேசிக்கு வந்த குறுஞ்செய்தி:

தமிழ்நாட்டில் மின்சாரம் தாக்கி இறந்தவர்கள் எண்ணிக்கை

2007 - 86

2008 - 75

2009 - 15

2010 - 5

2011 - ௦௦௦௦௦0

- ‍‍கொய்யால மின்சாரம் இருந்தாதானடா சாவீங்க...

இது நகைச்சுவைக்காக அனுப்படிருந்தாலும் அதில் உள்ள செய்தியை நம்மால் மறுக்க இயலாது.சமீபகாலமாக எப்பொழுது மின்சாரம் போகிறது எப்பொழுது மின்சாரம் வருகிறது என்றே தெரியவில்லை.கடந்த ஆட்சியிலாவது அறிவித்து விட்டு மிசாரத்தை தடை செய்வார்கள் ஆனால் இப்பொழுதெல்லாம் எப்பொழுது மின்சாரம் தடைசெய்வார்கள் எவ்வளவு நேரம் மின்சாரம் போகும் என்பதே தெரியவில்லை.(தூக்கம் கெட்டு கண்விழித்த போது யோசித்தவைதான் இவையெல்லாம்). மின்சார உற்பத்திக்காக சில நடவடிக்கைகளில் அரசு இறங்கியிருப்பதை பாராட்டலாம் அனால் அவர்கள் செய்த அதே தவற்றை செய்வதன் மூலம் வெறுப்பை சம்பாதிக்கிறீர்கள் என்பதை மறந்து விடாதீர்கள்.

4. பேருந்து கட்டணம் மற்றும் அரசு மதுபான வியாபாரம்:

போன ஆட்சியில் கலர் கலராய் பேருந்து இயக்கி மக்களை வாட்டி வதைக்கிறார்கள் என்று கூறித்தான் ஓட்டு கேட்டு வந்தீர்கள்.நீங்கள் அதையே பின்பற்றுவது என்ன நியாயம் ? மக்கள் எப்படி போனாலும் பரவயில்லை வருமானம் வந்தால் போதுமா?.போன ஆட்சியில் காது கிழிய கத்திய கூட்டனி கட்சிகள் எங்கே? என்ன செய்கிறார்கள் எதிர்கட்சியினர்?.சொகுசு பேருந்து என்ற பெயரில் ஏன் இவ்வளவு கட்டணகொள்ளை. சாதரன பேருந்துகளுக்கும் சொகுசு பேருந்துகளுக்கும் இடையே என்ன வித்தியாசம் வைத்திருக்கிறீர்கள் (தானியங்கி கதவு தவிற).எதற்க்காக போக்குவரத்து மிகுந்த காலை,மாலை நேரங்களில் சொகுசு பேருந்து மட்டுமே இயக்குகிறீர்கள். குறைந்த பட்சம் சாதரன பெருந்துகளை மட்டும் அதிகரிப்பதற்க்கும் ,வேலை நேரங்களில் சொகுசு பேருந்துகளை மட்டும் இயக்கும் பழக்கத்தினை மாற்றி சாதாரன பேருந்துகளையும் இயக்க ஆவன செய்யுமா இந்த‌ அரசு?.

நீங்கள் உருவாக்கிய வருமான கூடம் அரசு மதுபான வியாபாரம், நன்றாக பயன்படுத்தியவர்கள் போன ஆட்சியாளர்கள். ஆனால் அதில் வேலை செய்யும் படித்த இளைஞர் கூட்டம் என்ன பாவம் செய்தார்கள்,அவர்களின் பணி என்று நிரந்தரம் செய்யப்படும்,இதை நம்பி வேறு வேலையில்லாமல் இருக்கும் அவர்களுக்கு என்ன செய்தி சொல்லபோகிறீர்கள்?

5. ஈழம் மற்றும் கச்சதீவு பிரச்சனைகள்:

இந்த இரண்டு விசயத்திலும் நீங்கள் எடுத்த முடிவுகளை மனதார பாராட்டுகிறோம் அதே நேரத்தில் இத்தோடு நின்று விடாமல் மெலும் பல அழுத்தங்களை சர்வதேச நாடுகளுக்கும், மத்திய அரசுக்கும் கொடுக்க வேண்டுகிறோம். கச்ச தீவை பெறவேண்டும் என்ற தீர்மானத்தில் இருந்து ஒரு போதும் பின்வாங்காதீர்கள்

இலங்கை பொருள்களுக்கு தடை விதித்துள்ளது உண்மையில் அமலில் உள்ளதா? எனக்கு தெரிந்த சில இடங்களில் இலங்கை தயாரிப்புகள் விற்பனை செய்துகொண்டுதான் இருக்கிறார்கள். உதாரணமாக இந்திய தொழில்நுட்ப கழக வளாகம்(ஐ.ஐ.டி) போன்றவற்றில் தாராளமாக இலங்கை தயாரிப்புகள் கிடைக்கின்றன. எனக்கு தெரிந்த நண்பர்களிடமும் எடுத்து கூறி அவற்றை வாங்காமல் தவிர்க்கிறோம் மற்றவர்களை எப்படி தடுப்பது?. எப்படி இவற்றை கண்காணிக்க போகிறீர்கள், பெயரளவில் மட்டும் தீர்மானம் கொண்டு வருவது தேவை இல்லாதது அவற்றை எப்படி செயல் படுத்த போகிறோம்.

6. போக்குவரத்து நெரிசல்:

சென்னையின் இருக்கும் பெரிய பிரச்சனை போக்குவரத்து பிரச்சனை. நடந்து போய்விடலாம் என்று என்னும் அளவுக்கு போக்குவரத்து நெரிசல் இருக்கிறது. மெட்ரோ ரயில் திட்டம் முடிவடைந்தால் இதற்க்கான பிரச்சனை ஓரளவு முடியும் என நினைத்திருந்த மக்களின் நம்பிக்கையில் ஒரு கல் எறிந்து விட்டீர்கள். மெட்ரோ ரயிலுக்கு பதிலாக மோனொ ரயில் இயக்கப்படும் என்று அறிவித்திருக்கிறீர்கள். அந்த திட்டம் எவ்வளவு காலம் இழுக்கும் இன்னும் எவ்வளவு காலங்கள் நாங்கள் இந்த போக்குவரத்து பிரச்சனையை சமாளிப்பது. இந்த மெட்ரோ ரயில் திட்டத்தை என்ன செய்ய போகிறீர்கள்? அந்த திட்டம் முடிந்து அதற்கான தடுப்புகளை என்று எடுபீர்களோ அன்றுதான் கொஞ்சமாவது போக்குவரத்து பிரச்சனைக்கு தீர்வுகாண‌ முடியும். இந்த திட்டங்களுக்கு ஒரு தீர்வு காண முன்வருமா அரசு?

7. நில அபகரிப்பு பிரச்சனை :

இது கண்டிப்பாக வரவேற்க பட வேண்டிய ஒன்று.ஆனால் இதிலும் சில திருத்தங்கள் வேண்டும் பலிவாங்கும் நோக்கோடு ஒரு சாராரை மட்டும் கைது செய்வது தவிர்க்க படவேண்டும். தவறு யார் செய்திருந்தாலும் அது ஆளுங்கட்சி, முன்னால் ஆண்ட கட்சி என்ற பேதமின்றி நடவடிக்கைகள் வேண்டும். நிறைய அரசியல்வாதிகள் தான் ஒரு கட்சி, தன் மகன் ஒரு கட்சி, தன் மைத்துனர் ஒரு கட்சி என குடும்பங்கள் அனைத்தும் அனைத்து கட்சிகளிடமும் தொடர்புகளை வைத்துள்ளனர். இவர்கள் செய்யும் ஏமாற்று வேலைகளையும் கண்டு பிடித்து கட்சி பாகுபாடின்றி செயல் படவேண்டும். ஏழை மக்களின் ரத்தங்களை உறிஞ்சியவர்களை சட்டதின் முன் சரியான தண்டனை பெற்று கொடுக்க வேண்டும். அதே நேரத்தில் இதை சாதகமாக பயன்படுத்திகொண்டு பலிவாங்கும் நோக்கோடு செயல்படும் நபர்கள் மீதும் கடுமையான நடவடிக்கைகள் வேண்டும், இல்லையென்றால் இந்த நடவடிக்கைகள் பலிவாங்கும் நடவடிக்கையாகவே மாறிப்போகும்.

இவ்வளவு முக்கிய பிரச்சனைகளையும் இன்னும் பல பிரச்சனைகளையும் ஆராய்ந்து மக்களை முன்வைத்து தீர்த்து வைத்தால் தான் நம்பிக்கையுடன் ஓட்டு போட்ட மக்களுக்கு இந்த அரசின் மீது நம்பிக்கை வரும். முந்தைய அரசு செயல்படுத்தியது என்ற ஒன்றிற்காக எல்லா திட்டங்களையும் குழிதோண்டி புதைக்க நினைத்தாலோ, மக்கள் துன்பம் அனுபவிக்கும் செயல்களில் இறங்கினாலோ பாதிப்பு உங்களுக்குதான் ஏனென்றால் மக்கள் இப்பொழுது புத்திசாலிகள் எல்லாவற்றையும் உன்னிப்பாக கவனித்துக் கொண்டிருக்கிறார்கள். என்ன ஒன்று அவர்கள் அடுத்த தீர்ப்பு சொல்வதற்க்கு நான்கு வருடங்கள் ஆகும்.

பணம் பறிக்கும் இந்திய ஏழைகள்

2011-07-06T06:28:00.000-07:00

               இந்திய தொலைத்தொடர்பு துறையின் வளர்ச்சி உலகத்திலேயே மிகப்பெரிய ஆச்சர்யத்தையும் அறிவியல் துறையின் நம்பிக்கையையும் ஏற்படுத்தி இருக்கிறது அதே சமயம் அந்த தொலைத்தொடர்பு துறையின் வளர்ச்சி எந்த அளவு பாமர மக்களை வளர்சிப்பாதைக்கு அழைத்து செல்கின்றது என்பதும் முக்கியம். அவை வளர்ச்சியைத்தான் ஏற்படுத்தி இருக்கின்றதா? இல்லை பாதிப்புகளை உண்டாக்கி இருக்கின்றதா?

வளர்ச்சி யாருக்கு..? பாதிப்பு யாருக்கு..?

        தொலைத் தொடர்புதுறை தொழிலில் லாபம் அடையாத நிறுவனங்களே கிடையாது அந்த‌ அளவுக்கு அவர்களின் வியாபார யுக்திகளும் , கவர்ச்சி அறிவிப்புகளையும் நாளுக்கு ஒன்றாய் அறிவித்து மக்களை முட்டாளாக்குதிலும் முன்னனியில் திகழ்கின்றனர். அந்த அறிவிப்பிலும், கவர்ச்சியிலும் மயங்கி எழ முடியாமல் திக்கி தவிப்பது மக்கள்தான். மக்களை இரு வகைகளாக பிரித்துக் கொள்ளலாம் ஒருசாரார் நன்கு சம்பாதித்து பொழுது போக்காய் செலவு செய்யும் மக்கள், அவர்களுக்கு இந்த பிரச்சனை ஒரு பொருட்டே கிடையாது, தெரியாமல் சாலையின் எல்லைக் கோட்டை தாண்டி வண்டியை நிறுத்தி விட்டு போக்குவரத்து காவல்துறையிடம் 100 அல்லது 200 ஐ கொடுத்து விட்டு சென்று கொண்டிருக்கும் மக்கள் அவர்கள்(எதிர் கேள்வி எதுவும் கேட்கமாட்டார்கள்). தேவைக்கும் அவசரத்திற்க்காகவும் மட்டுமே பார்த்து பார்த்து செலவு செய்யும் ஒரு சாரார்,அதே காவல்துறையிடம் மாட்டிக் கொண்ட பின்னும் கெஞ்சி ,மண்ணிப்பு கேட்டு எந்த அளவுக்கு குறைக்க முடியுமோ அந்த அளவுக்கு குறைத்து பணம் கொடுத்து மனசு நோகும் ஒரு சாரார்.

        இந்த இரண்டாம் வகையினர்களை பற்றி கண்டிப்பாக பேசியாக வேண்டும்.சமீபத்தில் ஊருக்கு சென்றிருந்தேன் ஒரு உறவின் முறை (அவர் ஒரு கூலி தொழிலாழி) தனது அலைபேசியை எடுத்துகொண்டு என்னிடம் வந்தார்.

             "அப்பு நல்லா இருக்குறீங்களா? என்னானு தெரியல நான் எப்போ காசு போட்டாலும் எடுத்துகிறானுக என்னானு பாருங்கப்பு.."

                      என்று தனது அலைபேசியை கொடுத்தார்.அவர் அதை வைத்திருப்பதிற்க்கு காரணம் தனது மகள் வெளியூரில் படிக்கிறார் அவருடனான தொடர்புக்காக மட்டுமே அதை வைத்திருக்கிறார். நான் பார்த்தில் அவருக்கு தின ராசி பலன்(daily horoscope) மற்றும் மட்டை பந்து சேவை(cricket update) என்ற இரண்டு சேவைகள் செயல்படுத்தப் பட்டிருந்தது. நான் வாடிக்கையாளர் செவை மையத்திற்க்கு பேசி அந்த செவைகளை நிறுத்தச் சொல்லி அவரிடம் அலைபேசியை கொடுத்து விட்டு வந்தேன்.

        இப்பொழுது சொல்லுங்கள் நம்மையும் அறியாமல் நம்மிடம் பணம் பறிப்பவர்களுக்கு என்ன பெயர்?. பல சமயம் அவர்கள் அனுப்பும் குறுஞ்செய்தியை படித்தாலே சில சேவைகள் செயல்பட்டு விடுகின்றது. ஒன்றும் தெரியாதவர்கள் என்ன செய்வது பணத்தை இழந்து நிற்பதுதான் மிச்சம். நுகர்வோர் மையத்தையோ நீதிமன்றத்தையோ அனுகலாமே என்று கூறும் அறிவு ஜீவிகளே இன்றைய சூழலில் நன்கு படித்து எல்லாம் தெரிந்தவர்களே நீதிமன்றம் , நுகர்வோர் மையம் என்று அழைவதற்க்கு முடியாமல் எல்லாவற்றையும் சகித்துக் கொண்டு செல்லும் போது பாமர மக்கள், ஏழைகள் என்ன செய்து விட முடியும்.

        அவர்களை தொடர்பு கொள்ளும் முன் இந்த பொத்தானை அழுத்து அந்த எண்ணை அழுத்து என்று படாத பாடு படுத்தி விடுவார்கள்,அதற்க்குள் நமது பொறுமை எல்லாம் கரைந்து விடும்.அப்படி தொடர்பு கொண்ட பின்னும் அவர்கள் நம்மை காக்க வைக்கும் நேரம் இருக்கிறதே அதை சொல்லி மாளாது....
           அலைபேசி வாடிக்கையாளர் மையம் எதற்க்கு என்று தெரிந்தவர்கள் சொல்லுங்கள்.எத்தனை பிரச்சனைகளை அவர்கள் தீர்த்து வைத்திருப்பார்கள்? உண்மையாகவே இவர்களுக்கு இருக்கும் பிரச்சனை தெரியாதா? தெரிந்தும் ஏன் மறைக்கிறார்கள்? அவர்கள் சொல்வதை சொல்லும் கிளிப்பிள்ளை போல்

"வணக்கம் தங்களுக்கு என்ன பிரச்சனை தெரிந்து கொள்ளாமா?"
"காத்திருந்தமைக்கு நன்றி"
"விரைவில் சரி பார்க்கிறோம் சேவை மையத்தை அனுகியதற்க்கு நன்றி".

இவைதான் பெரும்பாலும் கேட்க கூடிய பதில்.இதை சொல்வதற்க்கு எதற்க்கு அவர்கள்.இந்த லட்சனத்தில் அதை பதிவு வேறு செய்து கொள்கிறார்கள்.பதிவு செய்வதை ஒரு முறையாவது கேட்டிருப்பார்களா அதன் மேளாளர்கள்? பின்பு அப்படி இத்தனை பிரச்சனைகள். யாராவது சொல்லுங்கள் நீங்கள் வாங்கியதில் இருந்து உங்கள் அலைபேசி சேவையில் எந்த ஒரு பிரச்சனையும் இருந்ததில்லையா?.

        குறைந்த பட்சம் ஒவ்வொரு நிறுவனமும் 10 கோடி வாடிக்கையாளர்கள் வைத்திருக்கும்.ஒவ்வொருத்தருக்கும் குறைந்த பட்சம் 1 ரூபாய் மோசடி செய்வதாக கணக்கிட்டால் கூட‌ 10 கோடி ரூபாய் கொள்ளை அடித்திருக்கிறார்கள்,இவை குறைந்த பட்சம் அதிகபட்சம் எவ்வளவோ யாருக்கும் தெரியாது.இந்த நிறுவன தலைவர்கள்தான் அலைக்கற்றை ஒதுக்கீட்டிலும் தங்களது வேலைகளை காட்டி பல கோடிகளை சுருட்டி இருக்கிறார்கள் ஆக நாட்டையும்,நாட்டு மக்களையும் சுரண்டி கொலுத்து பெருகும் இவர்கள் பணக்காரர்கள்... ஆனால் இந்தியா ஏழைகள் நிறைந்த‌ நாடு.

        குறைந்த பட்ச சமுதாய நோக்கம் கூட இல்லாமல் அப்படி சம்பாதித்து என்ன செய்ய போகிறார்கள் இவர்கள்?. இப்பொழுதே பல பறவைகளை (எ.கா:சிட்டுகுருவி,செண்பகம் மற்றும் குயில்) காண முடிவதில்லை, பலருக்கு கதிர்வீச்சு பாதிப்பு கொஞ்சம் கொஞ்சமாக பரவுகின்றது. எல்லாம் அலைபேசி கோபுரங்களின் அன்பளிப்பு. இவற்றையெல்லாம் முறைபடுத்தி சில இடங்களில் மட்டும் வைக்கலாமே ஏன் கண்ட இடங்களில் வைத்து பாதுகாப்பற்ற ஒரு சூழ்நிலையை உருவாக்குகிறார்கள். இயற்க்கையை ஏன் உதாசீன படுத்துகிறார்கள். சேவை கட்டணம் என்ற பெயரில் பணம் வசூலிப்பது போதாமல் ஏன் மக்களின் வயிற்றெரிச்சலை கொட்டிக்கொள்கிறார்கள். இந்த பணக்கார‌ ஏழைகள் எவ்வளவு நன்மைகள் இந்தியாவிற்காக செய்திருக்கிறார்கள்?

                    தொலைதொடர்பு துறையில் நன்மைகளே இல்லையா என்று கேட்க வேண்டாம். தீமைகளை களைய வேண்டும் என்பதே எண்ணம்.

        தனியார் மயம் என்ற போர்வைக்குள் என்று இந்தியா புகுந்ததோ அன்றிலிருந்தே போர்வைக்குள் நடக்கும் மர்மங்களும், கொள்ளைகளும் வெளித்தெரியாமலே போய்க்கொண்டிருக்கிறது. இந்த தனியார்மய வாதிகள் கடைசியில் பிடுங்குவது மக்களின் பணம். (இவர்கள்தான் இந்தியவின் பெரும்பணக்காரர்கள் ஆனால் இவர்கள் பிச்சைகாரர்கள், திருடர்களை விட கேவலம்). இந்த இந்தியாவின் நோய்களை, ஊழல் பெருச்சாலிகளை எப்படி புறக்கணிக்க போகிறோம்..? அரசியலுக்கு அப்பாற்பட்டு இந்தியாவின் நன்மைக்கு உட்பட்டு... யோசிப்போமா..?

தயாராய் இரு என் தமிழினமே....

2011-01-29T06:16:00.000-08:00

முப்ப‌து பேருந்து கொளுத்துவோம்

முழுவ‌தும் ஊர‌ட‌ங்கு செய்வோம்

அர‌சிய‌லுக்காய் அடித‌டி ப‌ண்ணுவோம் ஆனாலும்

அமைச்சர் பேர் சொல்லி அழ‌காய் த‌ப்பிப்போம்...

சொந்த நாட்டில் சுதந்திர கொடி ஏற்றா விட்டாலும்

அண்டை நாட்டு தேசத்திற்க்கு

அதிகாரம் கொடுப்போம் என்போம்…

பாராளுமன்ற வளாகத்தில்

பத்து ரூபாய்க்கு உணவு கிடைக்கும்‍ இருந்தும்

ப‌த்தாது ச‌ம்ப‌ள‌ம் என‌

ப‌ல‌ம‌ட‌ங்கு உய‌ர்த்திக் கொள்வோம்...

பணம் பதுக்குவோம்

பட்டியல் இடமாட்டோம்

நிலம் அபகரிப்போம்

நேர்மை உள்ளவர் என்போம்...

ஏர் பிடிப்பவர் இறந்தாலென்ன‌

மீன் பிடிப்பவர் மறைந்தாலென்ன‌

இற‌ந்த‌வ‌ரின் கல்லறையில் கொடியேத்தி

ஏக‌போக‌அர‌சிய‌ல் செய்வோம்...

பாவ‌ப‌ட்ட‌ஜென்ம‌ங்க‌ள்

ப‌ட்டினியால் கிட‌ந்தாலென்ன‌

பாலும்,ப‌ல‌ச‌ர‌க்கும் விலையில்

ப‌ல‌ம‌ட‌ங்கு உய‌ர்ந்தாலென்ன‌...

எங்க‌ளை தேர்ந்தெடுக்க‌உங்க‌ளுக்கு

ஆயிர‌ம் ரூபாய் கொடுத்து

அடிமை ஆக்கிய‌ க‌தை தெரியாதோ...?

அறிவு ஜீவிக‌ள் யாரும்

வாக்கு ப‌திக்க‌வ‌ரமாட்டார் என்ற‌

அடிப்ப‌டைதான் எங்க‌ளுக்கு புரியாதோ...?

கொடிபிடிக்கும் என் தமிழினமே

கொண்டாட‌ த‌யாராய் இரு…

ஆயிரம் ரூபாய் பணமும்

ஆட்டுக்கால் பிரியாணியும் தயார்…

நாங்கள் வருகிறோம் உங்கள் வீட்டுக்கு

நீங்கள் தயாராய் இருங்கள் வாக்களிக்க...!!

வீரவணக்கம் ....!

2010-11-26T01:27:00.000-08:00

26/11 மும்பை தாக்குத‌ல்

வருடங்கள் இர‌ண்டு நகர்ந்தது
வாழ்க்கையும் நகர்கின்றது
நீங்கள் விட்டு சென்ற
தடயங்கள்...தாகங்கள்...
இன்னும்...இன்னும்...என்றும்
நகர்வதில்லை தோழர்களே....

கொடுத்தீர்க‌ள் உயிரை எங்க‌ளுக்காக‌ - வ‌ந்த‌
கொடுங்கோல‌ன் இன்னும் இருக்கையிலே...
த‌டுத்தீர்க‌ள் பாதிப்பை நாட்டுக்காக‌
த‌ர‌மில்லா ம‌னித‌ர்க‌ளின் மூர்க்க‌த்தினாலே‌...

இழ‌ப்புக‌ளை எங்க‌ள் ப‌க்க‌ம் வைத்துக்கொண்டு
எதிரிக்கு இர‌ண்டு கோடிக‌ளை செல‌வ‌லிக்கிறோம்
புரட்சிகர மாவீரர் உங்க‌ளுக்கு
புண்ணிய‌மாய் என்ன‌ செய்தோம்...?

த‌ழும்புகளை த‌ங்க‌மாக‌ ஏந்திக்கொண்டு
விளிம்புக‌ளில் வீர‌ம‌ர‌ண‌ம் அடைந்தோரே...
நினைவுக‌ளில்... நேச‌ங்க‌ளில்... என்றும்...
எம்மை விட்டு எங்கும் நீங்க‌மாட்டீர் தோழ‌ர்க‌ளே...!

க‌ர்க‌ரே..காம்தே...கம்ப்ளே..சலாஸ்கர்...சந்தீப் - என‌
க‌ள‌ப்ப‌ட்டிய‌ல் நீண்டு இருக்கிற‌து...
காவிய நாய‌க‌ர்களே உங்க‌ள் நினைவுக‌ள்
க‌ண்ணீராய் எங்க‌ளோடு க‌ல‌ந்தும் இருக்கிற‌து...!

உயிரின் சுவாசத்தை நாட்டிற்காய்
ஒப்புவித்து கொடுத்தோரே - உங்களுக்காய்
உண்ர்வுகள் ஒன்றுபட்டு ஒற்றுமையாய் சொல்லுகிறோம்
உளமார்ந்த வீரவணக்கம்...!!

குடிமகனார்கள் ஜாக்கிரதை.....!

2010-11-15T06:48:00.000-08:00

எழுதனும்னு நினைக்கும் போது நேரமில்லமை அது இதுனு ஏதவது ஒரு காரணத்தினாலே முடியாம போயிடுது சரி எழுதுவோம் எதையவதுனு கணினி முன்னால அமர்ந்தேன் என்ன எழுதலாம்னு நெனைக்கிறப்போ படிச்ச செய்தியும் நேத்து பாத்த இடமும் நினைவுக்கு வர இத எழுத ஆரம்பிச்சாச்சு.....

படித்த‌செய்தி :தீபாவளிக்கு "மதுபான‌கடை"யில் பயங்கர கூட்டம்: ரூ.300 கோடிக்கு மேல் சரக்கு விற்பனை

பார்த்த காட்சி :ஒரு "மதுபான‌கடை" பக்கத்தில் கழிப்பறை கட்டிடம் இல்லாத கழிபறையில் புரண்டு கிடந்த குடிமகனார்.

எதுவுமே ஒரு அளவுக்கு மேல போனா நமக்கு போதை அதிகம் ஆயிடுறது சகசம்தான் ஆனால் போதையே அளவுக்கு அதிகமா போனால் என்ன செய்வது.மனிதன் நிலைகுலைந்து தன்னை மறந்து தரையை மெத்தையாவும் கழிவுகளை வாசனையாகவும் ஏத்துகிட்டு மூச்சு இருக்கா இல்லையானு தெரியாத அளவுக்கு கிடந்த நான்பார்த்த அந்த மனிதரை போல கிடக்க வேண்டியதுதான்.அப்படி என்னத்த நான் பாத்துட்டேனு கேள்வி கேக்குறீங்களா இதோ இதுதாங்க நடந்தது....

நான் தினமும் போய் வரும் வழியில் ஒரு மதுபான‌கடை(அங்க மட்டும்தான் இருக்கானு கேக்குறவுங்க மண்ணிச்சுகோங்க எங்கெங்கு இருக்கோ அங்கேயெல்லாம் அப்பிடிதான்னு நினைக்கிறேன்) தினம் நான் போகும்போது மூக்கை பிடிக்காம நடந்து போறதுங்கிறது அவ்வளவு எளிதான காரியம் இல்ல அந்தளவுக்கு நாற்றம்,யாராவது சரக்குதான் அந்த அளவுக்கு வீசுதுனு தப்பா நெனெச்சிடாதீங்க அது சரக்க அடிச்சுட்டு குடிமகனார்கள் விட்டு செல்லும் சரக்குகள்.எல்லா விற்பனை நிலையங்களுக்கு அருகிலேயும் இப்படிபட்ட திறந்தவெளி கழிப்பிடங்களை காண முடியும்.அப்படி பட்ட இடத்துல உச்சகட்ட உற்சாகத்தில ஒருத்தர் படுத்து உருண்டுவருகிறார் வேறென்ன சொல்ல.....

மூனு மணிநேரம் கடையில உக்காந்து மூச்சுமுட்ட குடிக்கிறது வெளில வந்ததும் வெளியெத்தி விட்டுறது,மூனு மணி நேரம் பொருத்த நீங்க கொஞ்சம் கழிப்பிடம் தேடிபோய் வெளியேற்றலாம் இல்லியா?.குடிமகனார் யாரையும் நான் குற்றம் சொல்றேன்னு தப்பா எடுத்துகாதீங்க ஏன் நான் சொல்றேனா நீங்களே உற்ச்சாக மிகுதியில அதில உருண்டு புரள வாய்ப்பிருக்குதில்லையா நான் பார்த்த அந்த நபரைபோல நீங்களும் ஒருநாள்...(!) அதனால உங்க சுற்றத்தை நீங்கதான் சுத்தமா வெச்சிருக்கனும் முடிஞ்ச அளவு சுத்த‌மா வெச்சுகோங்க‌… இல்ல குறைந்த பட்சம் நீங்க‌சுத்த‌மெல்லாம் ப‌ன்னா‌விட்டாலும் அசுத்த‌ம் ப‌ன்னாம‌இருங்க‌ள்.நீங்க‌ளும் த‌ப்பிப்பீர்க‌ள் அடுத்த‌வ‌ர்க‌ளும் த‌ப்பிப்பார்க‌ள்.....

இப்போதெல்லாம் நம் மக்கள்,முக்கியமா நம்ம இளைஞர்கள் ரொம்பபப‌... முன்னேறிட்டாங்க ஒரு பொண்ணு பாத்துட்டா,பரீச்சையில தேர்ச்சி/தோல்வி அடைஞ்சா, உடம்புல அடிபட்டா ,சம்பளம் வந்தா,அலுவலகத்தில மேளாளர் பாராட்டினா/திட்டினா,காலைல சீக்கிறம் எழுந்தா,மூச்சா போகலைனா கூட... கொண்டாடனும்…... கொண்டாடனும்…...அதுதான் குறிக்கோள்….. அதுக்கு ஒரே ‘ம(வி)ருந்தா’ இதை எடுத்துக்கிறாங்க....

இப்பொதெல்லாம் எதுக்கெடுத்தாலும் ஒரு காரணம் சொல்லிட்டு குடிக்கிறது வழக்கமா போயிடுச்சு,குடிங்க அது உங்களோட சுதந்திரம்...விருப்பம்...அதுலயும் முக்கியமாக நாட்டோட வருமானத்துல உங்களோட பங்கு ரொம்பவும் முக்கியம் ஆகவே குடிமகனார்களே குடிங்க ஆனா யாருக்கும் பாதிப்பு வராம பாத்து குடிங்க(உங்களையும்தான் சேர்த்து சொல்றேன் உங்களுக்கும் பாதிப்பு வராம பாத்துக்கோங்க‌). உங்களுக்கு அறிவுறை சொல்ற அளவுக்கு நான் பெரியவன் இல்லை (மப்புல இருக்குற ஒருத்தரை அறிவுறை சொல்லிட்டு தப்பிச்சுட முடியுமா என்ன?)

இந்த விசயத்துல கிராமம்/நகரம் அப்படி எந்த பாகுபாடும் இல்லீங்க எல்லாருமே இப்பொ அதுக்கு அழையாத விருந்தாளியா இருக்கங்க.இப்போ எல்லாம் வீட்டுல நடக்கிற நல்ல ஒரு நிகழ்ச்சிக்கு போனாகூட அதுவும் ஒரு விருந்தா தனியா இருக்கு.இதற்கெனெ நிதிநிலை அறிக்கை கூட தாயரிக்கிறாங்க எல்லா செலவோடையும் இதுக்கும் தனியா ஒரு தொகை ஒதுக்கி விடுகிறார்கள்.யாராவது கலந்துக்காத ஆட்களையும் புடிச்சி தம்பி இது குளிர்பாணம் மாதிரிதான் தம்பி… ஒண்ணும் செய்யாது சும்மா சாப்பிடுங்கனு உசுப்பெத்தி விடுராங்க... ம்ம்ம் என்ன பன்றது காலம் 'குடி'காலம் ஆயிபோச்சு....

இப்படித்தான் நான் தங்கி இருந்த அறை நண்பர்கள் ஏதாவது ஒரு காரணம் சொல்லி கையில பையோடு வரும்போதெல்லாம் கொஞ்சம் பயமாகவே இருக்கும்.இவங்க காலைல முழிச்சு போற வரைக்கும் வாந்தி(இதுக்கு ஆப்‍‍பாயில் னு பேரு வேற‌) எடுக்காம இருக்கனுமே அப்படிங்கிற நினைப்புலேயே பாதி தூக்கம் போயிடும்.அவங்களுக்கு எதுவுமே தெரியற‌து இல்ல சுயநினைவு இருக்குற வரைக்கும் ஏதாவது ஒரு தலைப்பு எடுத்து பேசுறது(உண்மையிலேயெ ரொம்ப நல்லவங்களாக மாறிடறாங்க...).அதுவரைக்கும் சண்டை போட்டு பேசாதவன்கிட்ட கூட நீ என் நண்பேண்டா... னு வசனம் பேசுறது இப்படி பல நகைச்சுவைகள் நடக்கும்.கொஞ்சம் உச்சம் அடைஞ்ச உடனே ஒரு சின்ன சத்தம் கேக்கும் உவ்வேனு... பக்கத்துல இருக்கிறவன் எச்சரிக்கையா இருக்கனும் இல்லை அவ்ளோதான்.வேறென்ன அந்த இடமே நாறிபோயிடும் அதன்பிறகு அறையை சுத்தபடுத்துறதில இருந்து அவர்களை கழுவுறது வரைக்கும் தெளிவா இருக்குற யாரவதுதானே பண்ணனும் இப்போ புரியுதா ஏன் பயப்படனும்னு.

இதவிட ஒரு பெரிய நகைச்சுவை நடந்துச்சு,இப்ப்டித்தான் ஒருநாள் உச்சகட்ட உற்ச்சாகத்தில் உவ்வேவே போயிட்டு நல்லா அவன் தூங்கிட்டான் நாங்க எல்லா சேவைகளையும் செய்துட்டு தூங்க முடியாம நேரம் கழிச்சு தூங்கி எழறதுக்கு கொஞ்சம் நேரம் ஆயிட்டுது.அவன் எப்ப‌டியோ சீக்கிறமாகவே எழுந்துட்டான் எழுந்தவன் எல்லோரையும் எழுப்பி திட்டுனா திட்டு அவ்ளோ திட்டு திட்டுறான் என்ன காரணம்னு கேக்கலையே மக்கா..?

யாரோ வாந்தி எடுத்துட்டாங்களாம்... ஒரே வீச்சமா இருக்காம்...ஏண்டா குடிக்கிறவன் ஒழுங்கா குடிக்கிறதில்ல ஏண்டா இப்படி வாந்தி எடுத்து தொலைக்கிறீங்க னு கேள்வி வேற...(?!)

என்ன கொடுமை மக்கா..?

நீதாண்டா வாந்தி எடுதவன்னு சொன்னா அவன் நம்பவே இல்ல கடைசி வரைக்கும். எனக்கும் இதுவரைக்கும் நம்பவே முடியலைங்க அவன் உண்மையிலேயே பேசுனானா இல்ல தெரிஞ்சுதான் அப்பிடி பெசனும்னு பேசுனானா?

மப்பில்லாத நேரம் பாத்து பதில் சொல்லுங்க மக்கா.....:)

நீ வேண்டும்...!

2010-05-28T01:40:00.000-07:00

நன்றி:வார்ப்பு

நீ வேண்டும்...!
---------------------

இரவு நேரத்து பவுர்ணமி போல்
இதய தேசத்தில் நுழைந்தவளே...

ஒற்றை அன்றில் பறவை என்னை
உறவு கொடுத்து முழுமைபடுத்தியவளே...

வேஷங்கள் நிறைந்த இவ்வுலகில் என‌க்கு
வெளிச்ச புள்ளியாய் வ‌ந்த‌வ‌ளே.

குழந்தையாய் மாறும் கடைசி காலங்களிலும்
கூடி நீ என்னோடு தவள வேண்டும்
உன் வாய் ஒழுகும் சிறு உண‌வெடுத்து
உன்னோடு உண்டு நான் மகிழவேண்டும்...

இருப்பதெல்லாம் ஒன்றும் வேண்டாம்
இல்லையென்ற உன் அன்பு வேண்டும்.
என் வாழ்க்கை முடியும் வரை
என்னில் பாதியாய் இல்லை
எனக்குள் முழுமையாகவே நீ வேண்டும்...!

குறையாத‌ நேசம்....
----------------------

கையளவு உணவைகூட‌
கைகள் ஒன்றுகூடி
களிப்போடு உண்டு முடித்து
பசியை
அன்பால் நிரப்பிக் கொள்ளும்
அற்புதம் நிறைந்ததுதான் நட்பு...

சில்லரைகள் பெருகிபோனதால்
சேர்த்து வைத்த‌ நேசங்கள்
சிதறுகின்ற போதும்
கல்லரை சேரும்வரை கூட‌
கைகோர்த்து வரும்
கள்ளமில்லா நேசம்தான் நட்பு....

இன்பத்தை இரட்டிப்பாக்குவதும்
இதயத்தை தித்திப்பாக்குவதும்
துன்பத்தை துடைத்து போடுவதும்
துயரங்களை சருகாக்குவதும்தான்
தூய்மை கொண்ட நட்பு...

தேவைகள் நிறைந்த‌
வியாபார உலகத்தில் புதியதாய் பல‌
பொய்கள் சொன்னாலும் - நட்பெனும்போது
உண்மையை மட்டுமே
உரக்கச் சொல்வது நட்பு...

காலங்களின் சூழ்ச்சியில்
கண்பார்க்க முடியாவிட்டாலும்
உறவுகளின் நேச‌ சுழ‌ற்ச்சியில்
உற‌வாட‌ முடியாம‌ல் போனாலும்
இதய க‌ருவ‌ரையில்‍ எப்போதுமே
இருக்கும் குழ‌ந்தைதான் ந‌ட்பு...

நேற்று இன்று நாளை என‌
நெடுந்தூரம் சென்றாலும்
காற்று வாங்கி களைத்திருக்கும்
கருமைமிகு வானம் க‌ளைந்தாலும்
சேர்த்து வைத்த‌ உற‌வுக‌ள்
சித‌றியே போனாலும் நமக்கு
குறையென்று தெரிந்தால்
கூடவே வரும் கோடி ந‌ட்புக‌ள்தான்
என்றுமே நமக்கு குறையாத நேசம்....!!

http://www.vaarppu.com/view/2062/

முடிந்துபோன பாதை

எமக்கு...
வலிமையான கால் இருக்கிறது
வழி செய்யும் தோள் இருக்கிறது
மீண்டும் புதியது படைப்போம்
மீள அதிலே நடப்போம்...!

http://www.vaarppu.com/padam_varikal.php?id=56

தொலைந்துபோன ஒற்றைப் பாதணி...

இது தொலைந்த ஒன்று இல்லை
என் செல்ல குட்டியின் காலில் இருந்து
தொலைக்கப் பட்டதாய் இருக்கும்

கிழிந்த ஒன்று வேண்டாம் என்று
எத்தனை முறைதான் சண்டையிடுவாள்
பாவம் அவள்
இந்தமுறை நான் கேட்கபோவதில்லை
புதிதாய் வாங்கி கொடுத்து
புன்னகை வாங்க போகிறேன்.....!

http://www.vaarppu.com/padam_varikal.php?id=55

பாமரனின் வாழ்க்கை...!

2009-12-10T20:34:00.000-08:00

எலும்பும் தோலுமாய்
ஏக்கர் கணக்கில் உழவுதரும்
எங்களில் ஒருவரான ஏர்மாட்டிற்க்கு
வைக்கோல் கொடுக்க முடியாமல்
வந்த விலைக்கு விற்ற
வாழா வெட்டிகள் நாங்கள்....

கடைசி விதை வரை
களம் கொழிக்கும் கனவோடு
மார் இறுக உழைத்து
பயிர் பெறுக மழை வேண்டி
வானம் பார்க்கும் பூமியை கொண்ட
வாடிக்கை மனிதர்கள் நாங்கள்...

சொகுசு ஊர்திகளையும்
குளிர்சாதன பேருந்துகளையும்
காட்சிபொருளாய் பார்த்து விட்டு
சாதாரன ஊர்திக்காய் மணிக்கணக்கில்
சத்தமில்லாது காத்திருக்கும்
சாமானிய சிறுகுடிகள் நாங்கள்...

சிறு மளிகை அங்காடியும்
தள்ளுவண்டி காய்கறி கடையும்
தாயாக சோறு தந்தநாள் மறந்து
அயல்நாட்டு மொத்த கடைகளுக்கு
அனைத்தயும் அடகுவத்து அடங்கிபோன
அப்பாவி ஜென்மங்கள் நாங்கள்....

உழைப்பதை எல்லாம் பெருமுதலாளிக்கு
உண்மையாய் கொடுத்து விட்டு
வயிற்று பசி போவதற்க்கு
ஒற்றை ரூபாய் அரிசிக்காய்
மடியேந்தி நிற்க்கும்
மதிகெட்ட‌ மகராசிகள் நாங்கள்...

வாழ்வாதாரம் ஒன்றுக்காய்
வலையெடுத்து கடலுக்குள் போக
வழிநெடுக துயரங்கள் சேர
மீன்பிடிப்பதை விடுத்து
உயிர் பிடித்து வீடு வரும்
உப்பு சப்பில்லாதவர்கள் நாங்கள்....

தினம் நான்கு தேனீரும்
தெருக்கடை பண்டங்களும்
தைரியமாய் வாங்கி உண்டுவர‌
திக்கு தெரியாத விலைவாசியில்
உணவுக்கே ஊர்சுற்றி வரும்
ஒன்றுமறியா காற்றாடிகள் நாங்கள்...

கோடிகளில் புரல்வோரும்
மாடிகளில் வாழ்வோரும்
ஜாதிகளில் திகல்வோரும்
ஆட்சியில் இருப்போரும்
பாதகமாய் வாழ்ந்து வரும் - இந்த‌
பாமரரை நினைப்பீரோ...?

இணையத்தில் வெளிவந்த கவிதை:
நன்றி http://www.tamilauthors.com/03/101.html

பிரிதலும்... புரிதலும்...

2009-10-13T02:13:00.000-07:00

பொருளீட்டும் காரணமாய்
பருந்தையொத்த வாகணத்தில் நான்
பயணித்த காலங்களில்...

கல்யாணத்திற்க்கு காத்திருந்த
கனியமுது தங்கைகளும்
பொருள்களை சேர்த்திடாமல்
புண்ணியங்களை சேர்த்திருந்த பெற்றோரும்
புத்தியில் வந்துபோக...
புதுமகவை எதிர்நோக்கி காத்திருந்த
பூ உன் நினைவு நிறுத்தி
நெடுநேரம் நிலைகுத்தி நின்றேன்....

பாசி படர்ந்த ஒற்றை வயலில்
பாதம் பதித்து பழக்கப்பட்ட கால்கள்
பாலைவன மணலை தினம் தொட்டுபார்க்க
சூரியன் உச்சிமீது கனலை கொட்டிதீர்க்க
இப்படியாய்
நெருப்பொத்த தேசத்தில் எனக்கு வேலையாம்
நெஞ்சம் சோர்ந்து போகிறது தினம் கோழையாய்....

அங்கே
வெள்ளையும் கருப்புமாய் மனிதர்கள் - அவர்பிள்ளைக்கு
வேடிக்கை பொம்மையாய் எம்மேல் கொடுமைகள்
எள்ளுக்காய் அளவில் சிறு எறிகணைகள்
கொல்லுதல் இல்லாமல் முழங்கால் குறிபார்க்க
எதிர்த்து நியாயம் கேட்போர் எல்லோருக்கும்
ஏதிலி என்றோர் ஏளனமான பதில்இருக்கும்...

ஏறுபூட்டி உழுத நேரங்களில் அன்பே - உன்னோடு
இன்பமயமாய் கூடி வாழ்ந்து வந்தேன்
தார்கூட்டி எடுக்கும் இந்த தேசத்தில்
தாரகை உன்நினைவில் தவியாய் தவிக்கிறேன்
மாலைநேர சூரியன் மறைந்துஓட - உன்
மந்தகாச புன்னகை நினைவில் மயங்கிஇருக்க
தாணியங்கி இயந்திரமாய் களைப்பில் கண்சரிய
தவிப்பில்வந்த கண்ணீரை தலையணை அறியும்...

ஒலிவாங்கியில் உன்னோடு உலாவிய நேரத்தில்
உதடுஒட்டா முத்தம் ஒன்றை உலுப்பிவிட்டாய்
அது சொல்லிப்போனது
தள்ளிப்போகும் நாளுக்காய் தவிப்பதாய் - எனைவிட்டு
தனியாய் இருப்பதை தினம் வெறுப்பதாய்
அந்திசாய்ந்த விளக்கொளியில் அத்தனையையும் முறைப்பதாய்
அகல்விளக்கினை பார்த்து அர்த்தமற்று சிரிப்பதாய்....

என் கருவரையின் தோழிகளை
மணவறையில் பார்த்து விட்டேன் - காதல்
கண்மனியே வந்துவிட்டேன் கவலைபட்டினி தேயவேண்டாம்
இன்னொருமுறை நான் உன்னை பிரியமாட்டேன்
இந்த தேசத்தை விட்டு போகமாட்டேன்...

நோகாமல்பணம் கிடைக்குமென்று நூறுநாள்வேலை செய்யமாட்டேன்
நிறையபொருள் கிடைக்குமென்று நெடுந்தூரம் பிரியமாட்டேன்
சோம்பேறியாக்கும் கூட்டத்தில் இணையமாட்டேன் - உண்ண
சோறுபோடும் நம்நிலத்தில் உழைக்க தயங்கமாட்டேன்...!

நன்றி தமிழ்மன்றம்.காம்
தமிழ்மன்ற 18 வது கவிதை போட்டியில் இரண்டாம் இடம்.
http://www.tamilmantram.com/vb/showthread.php?t=21209

தேடுகிறோம் சுதந்திரத்தை...

2009-09-29T05:09:00.000-07:00

வியர்வை ஒழுகி
நரம்புகள் புடைத்து கிடைக்கும்
ஒருபோகம் விளைச்சலையும்
விலை தேடி அலையும்
விபரம் அறியா மக்களுக்கு
உங்களின் விரல்களின் எண்ணிக்கைதான்
விடுதலைக்காய் பெற்ற ந‌ம் சுதந்திரமா..?

உள்ளாடை வெளிதெரிய‌
உடுத்தும் உடைக்கு கொடுக்கும் சுதந்திரம்
ஒன்றுமே இல்லாத
உழைப்பாளியை நோக்கி - கோவணமென்று
உதாசீணம் செய்வதுதான்
உல்லாசதாரிக‌ள் உங்களது சுதந்திரமா..?

கீழ்மட்டம் மேல்மட்டம் என‌
குலங்களின் பெயர்சொல்லி
கூத்தடிக்கும் கொடூரர் உங்களுக்கு
கோவிலுக்குள் நுழைவதை தடுக்க‌
கொடுத்தது யார் சுதந்திரம்..?

வாக்குகள் விற்பனைக்கு என‌
வர்த்தக பலகை வைத்திருக்கும்
வழிப்பரியர் உங்களிடத்திலா
வாழ்க்கையின் சுதந்திரத்தை தேட...

மலம் தின்ன வைத்து
மனம் கொன்று வாழும்
மனிதர்கள் இவர்களிடத்திலா ந‌ம்
மகத்துவமான சுதந்திர கீதம் பாட‌...

ந‌வீன‌ பாஞ்சாலியாக‌
ந‌டு சாலையில் துகிலுரிக்க‌
நாண‌ம் இல்லா ம‌னித‌ர்க‌ள்
நாற்புற‌மும் பார்த்திருக்க‌
நாம் எங்கே போய் தேடுவ‌து
நல்லதொரு சுத‌ந்திர‌த்தை..?

ஏழ்மை... தாழ்மை...
எல்லாவற்றையும் ஒழிப்போம்
குற்றம்... கொடுமைகளை
குழிதோண்டி புதைப்போம்
பிறகு வாருங்கள்...
எல்லோருமாய் கூடி
இருக்கும் சுதந்திரத்தை
இன்பமயமாய் சுவைப்போம்..!

நன்றி யூத்புல் விகடன்:
http://youthful.vikatan.com/youth/india63/KRamesh15082009.asp

செவிலித் தாய்...

2009-07-30T04:40:00.000-07:00

ஒவ்வொரு மகவும்
உலகம் அறியா அதிசயம்...

கை மடக்கி விரல்சூப்பி
கண்ணயர்ந்த நிலையை பார்க்க‌
கண்கள் நூறு வேண்டும்...

முதல் அழுகை
முதல் புன்னகை
முதல் கோபம்
முதல்களில் எவ்வ‌ளவு ஆன‌ந்தம்...

பசியெடுத்து அழும்போதும்
குஷிவந்து சிரிக்கும்போதும்
கன்னக்குழி வரையும் ஒவிய‌த்தை
கால‌மெல்லாம் மனது ர‌சிக்கும்...

ப‌ஞ்சு போன்ற‌ மென்ப‌குதியில்
ப‌தித்து போடும் ஊசிக்கு
உத‌டு சுழித்து வ‌ரும் அழுகைக்கும்
ஓராயிர‌ம் அர்த்த‌ம் இருக்கும்...

புரியாத‌ போதும் ‍நாம்
அசையும் அசைவுக்கு
பொக்கைவாயால் பூக்கும் புன்ன‌கையில்
பூமிகூட‌ தலையை அசைக்கும்...

சொல்ல அளவில்லா இன்பங்களோடு
இத்தனை குழந்தைகளோடு
இன்பமாய் இருந்த போதும்
இத‌ய‌நோயினால் இழ‌ந்த
என் ஒரே ம‌க‌வை நினைக்கையில்
எதுவுமே இல்லாத‌வ‌ளாகி போகிறேன்..!

நன்றி யூத்ஃபுல் விகடன்: இந்த படைப்பு யூத்ஃபுல் விகடனில் வெளிவந்துள்ளது (27-07-2009).

கருணையை இழக்கிறதா மனித இனம்..?

2009-07-30T04:34:00.000-07:00

சென்னை போன்ற பெருநகரங்களில் இது போன்ற சம்பவங்கள் நடப்பது சாதரணம்தான் என்ற போதும் என் மனத்தினை உறுத்திய நிகழ்வுகளை இங்கு பகிர்ந்து கொள்ள விரும்புகிறேன்.

நிகழ்வு - 1 : இது சமீபத்தில் நடந்த நிகழ்வு. நான் அலுவலகத்துக்கு தினமும் பேருந்தில் செல்லுவதுதான் வழக்கம். 2 தினங்களுக்கு முன்னரும் அப்படித்தான் பேருந்தில் ஏறினேன். கூட்டம் மிகுதியால் பயணசீட்டு எடுப்பதற்கு 5 ரூபாய் பணத்தை பெண்மணி ஒருவரிடம் கொடுத்து அனுப்பினேன் (கூட்ட நெரிசலில் பேருந்து பயணத்தில் சிலர் உதவி மனப்பாண்மையோடு கொடுத்தனுப்பி டிக்கெட் வாங்கிக் கொடுப்பது நல்ல ஒரு விஷயம்) அந்த நேரத்தில் நிறைய நபர்கள் கொடுத்தும் வாங்கியும் கொண்டிருந்தனர். எனது சீட்டு தவறுதலாக என்னை கடந்து முன்னாடி நின்றவர்களிடம் கொடுத்துவிட்டார்கள். வாங்கியவர்களில் ஒருவர் காசு கொடுக்காமலே சீட்டை பெற்றுக் கொண்டிருக்கிறார். எனக்கு சீட்டு வரவில்லை.

நான் அந்த பெண்மணியிடம் கேட்க, அவர் இன்னொருவரிடம் கேட்க, அவர் கொடுத்த காசுக்கெல்லாம் சீட்டு வந்துவிட்டதாக சொன்னார். அவரும், நானும் "முன்னாடி கொடுத்தவர்களிடம் சீட்டை சரிபாருங்கள் அதிகமாக இருந்தால் கொடுங்கள்." என்று நின்ற நபர்களிடம் வேண்டினோம். முன்னாடி நின்ற யாரும் திரும்பிக் கூட பார்க்க மனமில்லாதவர்களாய் நின்று கொண்டிருந்ததை கவனிக்கையில் வேதனையாக இருந்தது. அதிலும் அங்கே இருந்தவர்களில் பெரும்பாலோர் இளைஞர்கள் என்பது குறிப்பிடத்தக்க விஷயம்.

எனது வேதனைக்கான காரணம்... 5 ரூபாய் அல்ல‌; ஆனால், அதற்கே நாட்டின் தூண்கள் எனப்படும் இளைஞர்களின் நம்பகத்தன்மை கேள்விக்குறியாய் இருக்கிறதே...? அவர்கள்தான் வைத்திருப்பார்கள் என்று குற்றம்சாற்ற விரும்பவில்லை. குறைந்த பட்சம் தங்களது சீட்டினை சரிபார்த்திருக்கலாம் அல்லது வேறு யாரவது வைத்திருக்கிறீர்களா என அருகில் உள்ளவர்களிடம் கேட்டிருக்கலாம். ஒரு சிறு தவறு நடந்திருக்கிறது. இதனைக் கேட்ககூட மனமில்லாதவர்கள் போல இருப்பவர்களை கண்டுதான் மனம் புழுங்குகிறது.

என்னிடம் சீட்டு வாங்க காசு வாங்கிய பெண்மணி என்னிடம் மன்னிப்புக் கோரினார். அவர் மீது எந்த தப்பும் இல்லை என்பது எனக்கு நன்றாக தெரிகிறது. எத்தனையோ பேர் இந்தப் பிரச்னைகளுக்காவோ என்னவோ எவ்வளவு கூட்டம் இருந்தாலும் காசு
கொடுத்து அனுப்பும் போது முகத்தை திருப்பிக் கொண்டு கண்டுகொள்ளாதவர்கள் போல் இருப்பார்கள். இப்பொழுது பிரச்னை என்னவென்றால், உதவி செய்யும் அவரைப் போன்ற நல்லவர்கள் நமக்கேன் வம்பென்று ஒதுங்கிக் கொள்ளதானே தோன்றும்.
நான் அவரை சமாதானப்படுத்தி இன்னொரு சீட்டு வாங்கிக் கொண்டேன். இதே போல் இன்னொரு நிகழ்வை அவர் பார்க்க நேர்ந்தால், சந்திக்க நேர்ந்தால் அங்கே சிறிய உதவி என்றாலும், அந்தப் பெண்ணின் கருணை மனப்பாண்மையை மனித இனம் இழந்துவிடும்தானே..?

நிகழ்வு - 2 : நான் அலுவலகம் முடிந்து சென்று கொண்டிருந்த சமயம் ஓர் இளைஞர் என் அருகே வந்தார். "அண்ணா ஒரு பதினாறு ரூபாய் கொடுங்கள். நான் பயணசீட்டு இல்லாமல் பயணம் செய்தேன். என்னை ஆய்வாளர்கள் பிடித்து காவல் நிலையத்தில் வைத்துவிட்டார்கள். அதோடு இருந்த எல்லாவற்றையும் எடுத்துக் கொண்டு விட்டார்கள். நான் ஊருக்கு போக பணம் இல்லை," என்றார்.

எனக்கு அந்த நேரத்தில் அவரைப் பார்க்க பாவமாக இருந்தது. அதோடு கையில் பிரபல அரசு கல்லூரிக்கான அடையாள அட்டையும் வைத்திருந்தார்.

"சரி என்னிடம் இப்போது சில்லறை இல்லை... மாற்றி தருகிறேன்," என அழைத்துச் சென்றேன். போகும்போதே என் மனம் பல்வேறு கேள்விக்கனைகளை தொடுத்தது. (ஒருவேளை அந்த நேரத்தில் சில்லறை இருந்திருந்தால் எடுத்து கொடுத்திருப்பேன்... பிறகு யோசனை செய்திருப்பேன்)

* இவர் உண்மையிலேயே பிரச்னையில் இருக்கிறாரா?

* ஏமாற்றுப‌வ‌ரா? அப்ப‌டியானால் நாம் ஏமாற‌ போகிறோமா?

இப்ப‌டி ப‌ல‌ கேள்விக‌ள் என் ம‌ன‌தில் எழுந்த‌த‌ற்க்கு ப‌ல்வேறு கார‌ண‌ங்க‌ள் இருக்கிற‌து.

ச‌மீப‌த்தில் இதே போல் ந‌ண்ப‌ர் ஒருவ‌ர் ஏமாந்த‌ அனுபவத்தை அறிந்தது ஞாபகத்துக்கு வந்தது. ஒரு குடும்ப‌மே இதேபோல் தின‌மும் ஏமாற்றுவ‌தை அந்த‌ வ‌ழியில் நான் க‌ண்டிருக்கிறேன். ஒரு வ‌ய‌து முதிர்ந்த‌வ‌ர், அவ‌ர் ம‌னைவி, ந‌டுத்த‌ர‌ வய‌துள்ள‌ ஒருத்த‌ர், அவ‌ர‌து ம‌னைவி ம‌ற்றும் ஒரு சின்னபெண், அவருக்கு 10ல் இருந்து 14க்குள் வயது இருக்கலாம். அந்த‌ சின்ன‌ப் பெண்ணை சில‌ ச‌ம‌ய‌ம் அந்த‌ வ‌ய‌தான‌வ‌ருட‌னும், சில‌ ச‌ம‌ய‌ம் ந‌டுத்த‌ர‌ வ‌ய‌துடைய‌வ‌ர்க‌ளிட‌மும் பார்க்க‌லாம்.

இவ‌ர்க‌ள‌து வேலையே இர‌வு தொட‌ங்கும் வேளையில் பேருந்து நிலைய‌துக்கு அருகில் நின்றுகொண்டு வ‌ருவோர் போவோரிட‌ம் "நாங்க‌ள் ப‌ண‌த்தை தொலைத்துவிட்டோம் ஊருக்கு போக‌ ப‌ண‌ம் இல்லை உத‌வி செய்யுங்க‌ள்," என‌ கேட்ப‌துதான். ப‌ல‌ர்
க‌ண்டுகொள்வ‌தில்லை. சில‌ர் அவ‌ர்க‌ளிட‌ம் க‌ருணை உள்ள‌த்தோடு ப‌ண‌த்தை கொடுக்கின்ற‌ன‌ர். இவர்கள் இந்த‌ ஏமாற்று வேலையையே தொழிலாக‌ செய்கின்ற‌ன‌ர். இவ‌ர்க‌ளை மாத‌த்தில் குறைந்த‌ ப‌ட்ச‌ம் மூன்று முறையாவ‌து நான் பார்த்திருக்கிறேன். இர‌ண்டு நாட்க‌ளுக்கு முன்கூட‌ ஒரு பெண் கையில் தேடி எடுத்து 50 ரூபாயை கொடுத்த‌தை நான் காண நேர்ந்த‌து. நான் அந்த‌ பெண்ம‌னியிட‌ம் எடுத்துச் சொல்ல‌வும் முடிய‌வில்லை... அவ‌ரை த‌டுக்க‌வும் முடிய‌வில்லை.

உண்மையிலேயே நான் அந்த‌ பைய‌னுக்கு செய்த‌ சிறிய‌ உத‌வியை நினைத்து ச‌ந்தோஷப‌டுகிறேன். அதே ச‌ம‌ய‌ம் என் ம‌ன‌தில் எழுந்த‌ கேள்விக‌ளுக்கு என்ன‌ ப‌தில் சொல்வ‌தென்றும் தெரிய‌வில்லை. 50 ரூபாய் கொடுத்த‌ பெண்ணின் க‌ருணை உள்ள‌ம் இங்கு கேள்விக்குறியாகிப் போனதை நினைத்து வ‌ருந்துகிறேன். ஒருவேளை அவ‌ருக்கு அது ஏமாற்று வேளை என்று தெரிந்தால் உண்மையிலேயே உத‌வி தேவைப்ப‌டும் ஒருவ‌ர் க‌ருணையை இழ‌க்க‌ நேரிட‌த்தானே செய்யும்.

இப்ப‌டி ந‌ட‌க்கும் நிக‌ழ்வுக‌ளை வைத்து கொஞ்ச‌ம் இருக்கும் க‌ருணை குறைய‌த்தானே வாய்ப்பிருக்கிற‌து. ம‌னித‌ இன‌ம் எவ்வ‌ள‌வோ மாற்ற‌ம் நிக‌ழ்ந்தாலும் அன்பு, உத‌வி, ப‌கிர்த‌ல் என‌ சில‌ மாறாத‌ குண‌ங்க‌ளால் தான் நிலைத்திருக்கிற‌து என‌ தோன்றும். அதுவும் கொஞ்ச‌ம் கொஞ்ச‌மாக‌ குறைந்தால் அடுத்த‌ த‌லைமுறைக்கு நாம் எத‌னை எடுத்துச் சொல்ல‌ப் போகிறோம்? வெறும் எச்ச‌ரிக்கை உண‌ர்வை மட்டும்தானா?

நன்றி யூத்ஃபுல் விகடன்: இந்த படைப்பு யூத்ஃபுல் விகடனில் சமீபத்தில் வெளிவந்துள்ளது.(21-07-2009)

கருவறை தின்ற கரு.......

2009-06-30T07:55:00.000-07:00

நன்றி தமிழ்மன்றம்:
தமிழ்மன்ற கவிதை போட்டியில் வாசகர்களால் தேர்ந்தெடுக்கப்பட்ட கவிதை:

http://www.tamilmantram.com/vb/showthread.php?t=20303

முலை பால் குடித்து
முன்னேற்றம் அடைந்தவன் - அவள்
தோல் சிறுத்து இருக்கும்போது
வாய்சோறு தரமறுக்கும் பிள்ளை... தாய்மை எனும்
கருவறை தின்ற கரு....!

பிச்சையாய் பெற்றேணும்
இச்சையை தீர்த்துக்கொண்டு
மிச்சத்தை தூக்கி எறியும்
காதலர்கள்... காதல் எனும்
கருவறை தின்ற கரு....!

குருவிகளையும் பறவைகளையும்
குறைந்து போக வைத்து
அலை கோபுரங்களை பெருகவிட்ட
அறிவியல்... இயற்க்கை எனும்
கருவறை தின்ற கரு...!

மழலை கொன்று
மனிதம் தின்று
மண்ணை வென்றதாய்
மார்தட்டும் மாக்கள்... மக்கள் எனும்
கருவறை தின்ற கரு....!

உரிமையை நிலைநாட்டும்
ஒரு மை விரலுக்கு
பத்து விரல் நீட்டி
பணம் பெற்றோர்... உரிமை எனும்
கருவறை தின்ற கரு....!

மும்பை தாக்குதல்
முல்லைதீவு கொடூரம்
காஜா படுகொலைகள்
அன்பெனும் உலகம்.... மனிதம் எனும்
கருவரை தின்ற கரு....!

கருவரை தின்னும் கருக்கள் மாறட்டும்
கருப்பையில் நின்று ஒன்று சேரட்டும்
உலகின் உன்னதம் வளர்க்கும்
லட்சிய மகவாய் மாறட்டும்....!
கருப்பை போற்றும்
கவின்மிகு உறவாய் வாழட்டும்...!!

யு(பு)த்தம்....?

2009-06-30T07:40:00.000-07:00

வெளியான கவிதை:
நன்றி மாலைமலர் இணையதளம்:
http://www.maalaimalar.com/Articles/DetailedInteractive.aspx?iDId=285

யு(பு)த்தம்....?
செல்லடிகளால் எம்மக்கள்
சிதையுறும் போது
எதிரிகளின் மீதுகூட இனம்புரியா
சீற்றம்தான் வருகிறது
சொல்வருடி அவர்களை - நீங்கள்
தூக்கும் போது
எம் இனத்தை என்னி
துக்கம் தொண்டை கவ்வுகிறது....

இனத்திற்க்குள்ளே பெருச்சாளிகள் உங்களுக்கெதிராய்
இனப்பெருக்கம் செய்யும்போது
ஈழத்தை உனக்காக
இரவல் கேட்பது முட்டாள்தனம்....

விழிநீர் விட்டாலே
வேதனை படும் என் கூட்டமே
நம் இனம் அங்கே
உதிரம் விட்டு
உருக்குழைந்து போகிறதே
உன் பங்குதான் என்ன...?

மகிழுந்து தேடி
பயணம் செய்யும் - என்
மண்ணுலக வாசிகளே
மரங்களினூடே வாழும் - எம்மக்கள்
மனசு தேடி போகமாட்டீரோ...?

குரோசிமாவில் கூட
ஒரே மூச்சில் குண்டெறிந்து
உருக்குழைத்து போனார்கள்
ஆனால் நீங்கள் - இங்கே
கொஞ்சம் கொஞ்சமாய்
குறிவத்து கொன்று எரிக்கிறீர்கள்...!

மண்ணிழந்து ,வீடிழந்து
மழையோடும், வெயிலோடும்
உயிர்மட்டும் சுமந்து செல்லும்
ஒன்றுமறியா மக்களின்
உதிரம்தான் வேண்டுமா...?

ஏன் இந்த கொடூரம் உங்களுக்கு
நிறைமாத கற்ப்பினியை
நிரடலற்று புணர்தல் போல....?

குழந்தைகளின் தலை நோக்கி
துப்பாக்கி குழல் நீட்டும்
உங்களிடத்தில் போய்
இரக்கத்தை கோருவது
இறந்தவனிடத்தில்
இரவல் கேட்பதற்க்கு சமர்.....!

குழந்தைகளையும்
முதியோரையும்
கொன்று குவிக்கும்
யுத்தத்தை தொடர்ந்து கொண்டு
நாங்கள்
புத்தன் பிறந்த பூமியென்றும்
நீங்கள்
புத்தம் வளர்த்த பூமியென்றும்
பூரிப்பு அடைவதில்
புண்ணியம் ஒன்றும் இல்லை...!!

மாறுவது எப்போது...?

2009-06-30T07:36:00.000-07:00

மாறுவது எப்போது...?
(முகவைமுரசு வார இதழில் வெளிவந்த கவிதை - ஆகஸ்ட்-31 to செப்டம்பர்-6,2001)

உழைப்பு என்பதே தெரியாமல்
உறங்கி பொழுதை கழிக்கும்
முதலாளி வர்க்கம்...

ஓய்வு என்னவென்று தெரியாமல்
உடலை வருத்தி உழைக்கும்
உழைப்பாளி வர்க்கம்...

மகத்துவம் செய்யப்பட வேண்டிய
மதங்களையும்,ஜாதிகளையும்
வதம் செய்து வாழும்
வகுப்பு தலைவர்கள்...

உதிரம் குடித்தேனும்
ஓட்டுப்பெற்று ஒளிந்து கொண்ட
அரசியல் கூட்டம்...

அன்பு எனும் மருந்தை
அதிபாதாளத்தில் வீசிவிட்டு
அடிதடியை நாடும்
ஆக்ரோசமான களையர் கூட்டம்...

காதலின் புனிதம் அறியாமல்
கன்னியரை கலங்க வைக்கும்
"ஈவ்டீசிங்கை" கையில் எடுக்கும்
இளைஞர் கூட்டம்...

எந்த ஒரு செயலுக்கும்
எளிதாக லஞ்சம் கேட்க்கும்
எங்கள் அரசு ஊழியர்கள்...

இவர்கள் எல்லாம் மாறுவது எப்போது...?
நாம் மகத்துவம் பெறுவது எப்போது...?

இனியும் வேண்டாம்...

2009-01-26T04:49:00.001-08:00

(குஜராத் பூகம்பத்திற்க்கு நினைவு அஞ்சலி)
(பரமக்குடி முகவைமுரசு வார இதழில் வெளிவந்த கவிதை - ஜனவரி 25 to 31,2002)

குடியரசு தினத்தில்
குதூகலம் கொண்ட மனங்களில்
கோரமான சோகம்...

கட்டிடங்கள் சிறு
கற்களான கொடுமை...
கொடியேற்றிய சிறார்கள்
கோரமான கொடுமை...
மக்கள் வசித்துவந்த புஜ்
மயானமான கொடுமை...
அழகாய் இருந்த குஜராத்
அழிந்த ஒரு கொடுமை...
அன்பிற்க்கினிய இந்தியா
அழுத ஒரு கொடுமை...

அழத்தான் செய்தோம்...!

தம்பியை தேடும்
சகோதரிகள் இருவர்
"சஞ்சீ" என்று அழுதபோது...

மடியினில் மகனை வைத்து
மாயமாய் தன் உயிர் போனபோதும்
மகனை காப்பாற்றிய - அந்த
மகர ஜோதியை நினைத்த போது...

குடிசைகள் எல்லாம்
அழிந்த பின்னும்
கை குழந்தையோடு - அந்த
கோரத்தை பார்த்து கொண்டிருந்த
சகோதரனை பார்த்தபோது...

பத்துமாடி பணக்காரன் நேற்று
பைசா இல்லை
பிச்சைக்காரன் இன்று
பசிக்கிறது சாப்பாடு கொடு - என்ற
பெரியவரை பார்த்தபோது...

ஆறுதல் பட்டோம்...!

மனித நேயத்துக்கு ஏதடா மதம் என
மக்களுக்கு இரத்தம் தந்த - அந்த
முஸ்லீம் சகோதரர்களை நினைத்தபோது...

மதமும் இல்லை...
ஜாதியும் இல்லை...
மாற்றம் இயற்க்கை கையில்
மாறிய மக்களை பார்த்தபோது...

புதையுண்டது புஜ் ஆனாலும்
இழந்தது எங்கள் தேசம் என
இந்தியாவே அழுது
ஆதரவு தந்தபோது...

இயற்க்கை தாயே...!
அழித்தது போதும்
ஆதரவு கொடு...!!
பூமியை சிதைத்தது போதும்
புன்னகைத்து முத்தம் கொடு...!!
இனியும் வேண்டாமே...
எங்களால் முடியாது
இன்னொரு துயரத்தை தாங்க...!!

புதியதாய் ஒரு பூமி வேண்டும்...!

2009-01-26T04:47:00.000-08:00

என் ஈழத்து சகோதரன்
எழுந்து நடக்க
ஏகதிபத்திய சுதந்திரம் வேண்டும்....!

ஆப்பிரிக்க நாடுகளில் வறுமை
அறவே இல்லையெனும்
அண்மை தகவல்கள் வேண்டும்....!

பயங்கரவாதம் தெரியாத
பண்பட்ட நேசத்தை
பங்காளி தேசங்கள் பகிற வேண்டும்...!

சாதிமத சாக்கடைகள் நீங்கி
சமத்துவ ஆறு
சங்கமித்தல் வேண்டும்...!

குண்டுகள் தொடுக்கும்
கொடூரர்கள் மறைந்து
அன்பு தொடுக்கும் நண்பர்கள் வேண்டும்....!

உலக கணினி செய்வோரையும்
உண்ண கழனி செய்வோரையும்
ஒரே சமராக பாவிக்க வேண்டும்...!

பணங்களுக்காக வாழும்
பச்சோந்தி மனிதர்கள் மாறி - நல்
மனங்களுக்காக வாழ வேண்டும்...!

பூலோகம் தழைத்தோங்க - இந்த
புயலான மாற்றங்கள் கொண்ட
புதியதாய் ஒரு பூமி வேண்டும்...!

சந்தோசம்...!

2009-01-26T04:40:00.000-08:00

சந்தோசம்...
ஒவ்வொரு மனிதனும்
வேண்டுவது... விரும்புவது...

பிறருக்கு கிடைக்கும் சந்தோசத்தை
தடுப்பது சந்தோசமல்ல...
சந்தோசம்...
மனதின் கரியம்...

நாமெல்லாம்...
ஆசைபடுவதையும்
ஆசை படுகிற விஷயம்
அடைவதை சந்தோசம் என்கிறோம்...

சந்தோசம் என்பது
குதூகலம்..
குதூகலம் என்பது
மனமலர்ச்சி
மனமலர்ச்சி என்பது
கள்ளமில்லா சிந்தனை
கள்ளமில்லா சிந்தனை என்பது
பிறரை நேசித்தல்
பிறரை நேசித்தல் என்பது
மனம்விட்டு பேசுதல்...

சந்தோசம் என்பது அன்புசெய்தல்
சந்தோசம் என்பது பகிர்ந்து கொள்ளுதல்
அன்பு என்பது அமுத சுரபி
அமுதசுரபி அள்ள அள்ள குறையாது...

அன்பு...
காசு பணம் கொடுத்தால் குறையும்
ஆனால்
காணமுடியாத அன்பை கொடுத்தால்
குறையாது..
பத்தாய் திரும்பி வரும்...!

அன்பு
அன்பின் உறவு
இதயத்தின் வரவு
அன்பு பாலைவனம் ஆகாது
அது எப்போதும் பூக்கும் சோலைவனம்
அதில்
மகிழ்ச்சி தேன் உண்ண
மனிதவண்டுகள் வந்துகொண்டே இருக்கும்...
வாழ்க்கை சிறக்கும்
வசந்தம் பிறக்கும்...!

என்ன செய்தாய் ... ?

2008-11-26T04:05:00.000-08:00

முத்தங்களுக்கு பொருந்தாது என
ஒதுக்கியது - என்
முகமாக இருந்து போகட்டும்...
மொத்தங்களுக்கும் பொருந்துமே - என் நேசம்
என்ன செய்தாய் அன்பே...?

என் காதல்...!

2008-11-25T06:31:00.000-08:00

உன் விழிகளுக்குள் நான் வீழ்ந்தது - உண்மைதான்
உன் காதலுக்கு நான் காத்திருந்தது - உண்மைதான்
உன் நினைவினை நான் நேசித்தது - உண்மைதான்
உன் பார்வைக்கு நான் பரிதவித்தது - உண்மைதான்
ஆனால் உன்
உண்மை நிலை அறியாமல் -என்
உள்ளத்தை எப்படி
உன்னோடு சேரவிட முடியும்...?

எங்க ஊரு அரசியல்...!!

2008-11-25T03:45:00.000-08:00

(ஆர்குட் - முத்தமிழ் மன்றம் நடத்திய கவிதை போட்டியில் இரண்டாம் இடம் பெற்ற கவிதை)

உணவு இல்லை உழவனுக்கு...
உடை இல்லை தச்சனுக்கு - ஆனால்
கட்சியின் பெயரால் - இங்கே
கஞ்சியும் பிரியானியும்
கம்புகளை தூக்குகிறது...!

வெய்யிலிலும்... மழையிலும்...
ஓட்டைக் குடிசைக்குள் ஒண்டிக்கிடந்தும்
அஞ்சும் பத்துமாய்
குருவிபோல் சேர்த்து
குடும்பத்தைப் பார்த்தாலும்...!
அர்த்த ராத்திரியில்
அத்தனையும் எரியும்
கட்சிகளின் வாசம்
கரிபுகையாய் தெரியும்...!

ஆளுயர விளம்பரங்களும்
அலங்கார மேடைகளும்
பல கோடி ரூபாய்களை
பங்கிட்டு செலவிடும்...
மூவாயிரம் பேரை வைத்து
முப்பது கூட்டம் கூட்டும் - அதில்
முழு பல கோடி கொட்டும்
இத்தனையும் நடக்கும்..!

உழவுக்கும் தொழிலுக்கும் - கடனாய்
ஓராயிரம் வாங்கினால்
ஒரு வருடம் முடிவத்ற்க்குள்
ஓடி வந்து கழுத்தை பிடிக்கும்...!
இதுவும் நடக்கும்...!!

ஒருபக்கம்..
சத்தமே இல்லாமல்
சரக்கு கட்டணம் உயரும்
பதற்றமே இல்லாமல்
பேருந்து கட்டணம் உயரும்
எதற்கென்று தெரியாமல்
எகிரும் வரிகள்...!

மறுபக்கம்...
வியர்வையை வயலில் போட்டு
உழைப்பை உணவாய் தரும் ஏழையின்
நெல்லுக்கும் மிளகாய்க்கும்
நெருடலே இல்லாமல்
விலைகள் குறையும்...!

புதிய சட்டங்கள்
பொக்கிசமான திட்டங்கள்
புற்றீசலாய் முளைக்கும்
புது அரசு அமைந்தால்
அத்தனை திட்ட்ங்களிலும்
புல்லுகள் முளைக்கும்..!

சீட்டுகளும் சில்லரைகளும்
கூட்டணிகளை மாற்றும்
பழி தீர்த்த்லும் பகை வளர்த்தலும்
வெற்றி பெற்றவன் பக்கம்
விருட்ச்சமாய் வளரும்...!

சகோதரனுக்காக...
தோழனுக்காக...
குடும்பத்திற்க்காக...
சாதிக்காக..
மதத்திற்காக..
மொழிக்காக - இங்கே
அரசியல் நடக்கிறது...
மக்களுக்காக நடக்கிறதா...?
மகான்களே சொல்லுங்களேன்...!!

http://www.orkut.co.in/Main#CommMsgs.aspx?cmm=42390143&tid=5284430110651767535&start=1

கவிதை: http://www.orkut.co.in/Main#CommMsgs.aspx?cmm=42390143&tid=5264585781332738698&na=4&nst=1&nid=42390143-5264585781332738698-5267558444025961199

ஹைக்கூ..

2008-11-25T03:16:00.000-08:00

ஹைக்கூ.....
===========

நீர் ஊற்றி
நீர் எடுக்கும் வித்தை
இளனீர்...!

வெள்ளை பூ அணிய கூடாது
வெள்ளை புடவை அணியலாமாம்
விதவையாம் ...?

கவிதை

2008-11-25T02:55:00.000-08:00

கடவுள் ....!

உலகை ஈன்றவர் கடவுள் என்றால்...
உன்னை ஈன்றவள் கடவுள் என்றால்...
உன்னை பயிற்றுவித்தவர் கடவுள் என்றால்...
உன்னை பண்பாளனாக்கியவர் கடவுள் என்றால்...

உனக்காக உணர்ச்சிகளை அடக்கி - தன்னையே தரும்
தாரகையும் கடவுள்தான்.....!